Syrski: U jakim by statusie ja ni byŭ, ja budu słužyć Ukrainie da Pieramohi

«Voiny. Ukraincy. Siońnia ja pakidaju pasadu Hałoŭnakamandujučaha Uzbrojenych Sił Ukrainy. Pierad tym jak pieradać kamandavańnie, chaču skazać niekalki słoŭ.

Dla kožnaha aficera heta najvialikšaja adkaznaść — uznačalić vojska padčas vialikaj vajny. Ja bačyŭ hetuju vajnu ź jaje pieršaha dnia ŭ 2014 hodzie, žyŭ frontam i viedaju canu kožnaha vyzvalenaha kiłamietra ŭkrainskaj ziamli.

U lutym—sakaviku 2022 hoda mnie vypaŭ honar kamandavać abaronaj Kijeva, i našymi ahulnymi namahańniami stalica vystajała. Toj ža viasnoj była źniataja pahroza poŭnaha akružeńnia Charkava.

Potym byŭ nastup na Charkaŭščynie, kali za ličanyja tydni my vyzvalili Bałakleju, Izium i Kupiansk. Paźniej na Danieččynie my źniščyli najbolš bajazdolnuju častku rasijskaj armii — PVK «Vahnier».

Ja pryniaŭ kamandavańnie armijaj u lutym 2024 hoda, u vielmi składany čas. Praciahvałasia abarona Aŭdziejeŭki. Našy padraździaleńni znachodzilisia ŭ paŭakružeńni. Adnym z maich pieršych zahadaŭ na hetaj pasadzie staŭ zahad arhanizavana vyjści z horada. Heta było ciažkaje rašeńnie. Ale ja pryniaŭ jaho, bo dla mianie isnavaŭ adzin hałoŭny pryjarytet — zachavańnie žyćcia ludziej.

A dalej byŭ hod, jaki źmianiŭ chod hetaj vajny. Razam my spynili nastup voraha na Charkaŭščynie. Praduchilili jaho nastup na Sumščynie. I praviali Kurskuju apieracyju — upieršyniu ŭ hetaj vajnie pieranieśli bajavyja dziejańni na terytoryju praciŭnika.

Chaču, kab heta było vyrazna zafiksavana: našaj metaj nikoli nie była akupacyja čužoj ziamli. Našaj metaj było sarvać padrychtavany voraham nastup na Sumy i Charkaŭ, adciahnuć jaho najbolš bajazdolnyja vojski i papoŭnić abmienny fond, kab viarnuć našych ludziej z pałonu. Usio heta było vykanana.

My źmianiali armiju nie tolki na poli boju, ale i ŭ jaje asnovie. My pieršymi ŭ śviecie stvaryli asobny rod vojskaŭ — Siły bieśpiłotnych sistem. My raźvili ich ad asobnych padraździaleńniaŭ da sistemy, jakaja siońnia daje vorahu adčuć, što biaśpiečnych tyłaŭ u jaho niama. My pabudavali novuju sistemu supraćpavietranaj abarony: stvaryli asobnaje kamandavańnie bieśpiłotnych sistem SPA, sfarmavali štatnyja padraździaleńni ekipažaŭ dronaŭ-pierachopnikaŭ, vybudavali ešałanavanuju sistemu prykryćcia nieba nad tyłam. Toje, što jašče niadaŭna było ekśpierymientam entuzijastaŭ, siońnia kožnuju noč źbivaje toje, što ličyłasia nieźbivalnym.

My zakryli Čarnamorski port u Navarasijsku, sistemna źniščajem «cieniavy fłot» voraha.

My pieraviali armiju na korpusnuju strukturu, pryviali ŭ štaby bajavych aficeraŭ i zrabili praviłam: šlach da kirujučych pasad prachodzić praz front.

Vyzvalajučy ŭkrainskija terytoryi, my praviali paśpiachovuju Dobrapolskuju apieracyju i nastupalnuju apieracyju na Alaksandraŭskim napramku. Praciahvajem strymlivać nastup praciŭnika na hałoŭnych napramkach i pravodzić nastupalnyja apieracyi na asobnych učastkach frontu.

Pra častku apieracyj, jakija my ažyćciavili za hetyja hady, ja nie maju prava havaryć i siońnia. Pra ich raskaža historyja. Skažu tolki adno: vorah ich zapomniŭ.

I pra hałoŭnaje — u jakim stanie ja pieradaju pole boju.

Sioleta pad maim kamandavańniem było vyzvalena 700 kvadratnych kiłamietraŭ našaj ziamli. Armija, jakaja jašče dva hady tamu viała ciažkuju abaronu, siońnia nastupaje.

Ja pieradaju svajmu pierajemniku armiju, jakaja nie tolki trymaje abaronu, ale i znachodzicca ŭ stanie nastupu — ź inicyjatyvaj, sa strukturaj, ź ludźmi, jakija viedajuć, jak bić voraha. I ja ščyra spadziajusia, što hety nastup budzie praciahnuty. Dla hetaha jość usio.

Dziakuju kožnamu sałdatu, siaržantu i aficeru, ź jakimi ja prajšoŭ hetyja hady. Nizka schilaju hałavu pierad siemjami našych zahinułych.

Ja kazaŭ heta raniej i paŭtaru siońnia: maja praca — vajna. Pasady mianiajucca, ale hety pryncyp — nie. U jakim by statusie ja ni byŭ, ja budu słužyć Ukrainie da Pieramohi.

Doŭhi čas nam sprabavali naviazać dumku, što ŭkraincy nie zdolnyja vajavać. My dakazali, što heta nie tak. Ukrainu abaraniaje hieraičny narod.

Naša kraina vystaić, kali kožny budzie rabić svaju spravu hetak ža samaaddana, jak heta robić ukrainskaje vojska», — napisaŭ Alaksandr Syrski.

• 13
• 1
• 0
• 0
• 0
• 0
• 0
• 1