U Maskvie znajšli paviešanym byłoha kiraŭnika terminała aeraporta «Šaramiećcieva», praź jaki vylataŭ u svoj apošni palot Pryhožyn
U Maskvie znajšli miortvym byłoha kiraŭnika terminała dziełavoj avijacyi aeraporta «Šaramiećcieva» Alaksieja Karšenku. Jaho cieła vyjavili 6 červienia na bałkonie kvatery. Pavodle paviedamleńniaŭ rasijskich ŚMI, śledstva razhladaje asnoŭnaj viersijaj samahubstva. Niezadoŭha da śmierci, prykładna za try tydni, Karšenku zvolnili z pracy, piša The Moscow Times.
Alaksiej Karšenka byŭ adnym sa stvaralnikaŭ VIP-terminała Šaramiećcieva, jaki adkryŭsia ŭ 2011 hodzie. Mienavita praz hety terminał u žniŭni 2023 hoda prajšoŭ samalot kiraŭnika PVK «Vahnier» Jaŭhiena Pryhožyna pierad svaim apošnim rejsam. Paśla vyletu biznes-džet raźbiŭsia ŭ Ćviarskoj vobłaści, u vyniku čaho zahinuli ŭsie, chto znachodziŭsia na borcie.
Pavodle infarmacyi ad krynic telehram-kanała «VČK-OHPU», Karšenka moh vałodać infarmacyjaj pra padrychtoŭku samalota da vyletu. Pavodle hetych paviedamleńniaŭ, padčas techničnaha absłuhoŭvańnia byli vyjaŭlenyja niaspraŭnaści, u tym liku prablema z adnym z ahrehataŭ, jaki paśla byŭ zamienieny. Taksama vykazvajucca niepaćvierdžanyja zdahadki, što ŭ novym abstalavańni mahło znachodzicca vybuchovaje prystasavańnie.
Pavodle paviedamleńniaŭ, paśla katastrofy supracoŭniki transpartnaj biaśpieki sprabavali vyvučyć materyjały pravierki samalota, adnak nie atrymali dostupu da videazapisaŭ, dakumientacyi i inšych materyjałaŭ. Častku dakumientaŭ, jak śćviardžajecca, zabrali supracoŭniki rasijskich śpiecsłužbaŭ.
U červieni 2023 hoda Jaŭhien Pryhožyn uznačaliŭ uzbrojeny miaciež. Paśla pieramoŭ pry pasiarednictvie Alaksandra Łukašenki ŭdzielniki miaciažu spynili ruch na Maskvu. Praz dva miesiacy samalot Pryhožyna paciarpieŭ krušeńnie.
Pa aficyjnaj viersii rasijskich uładaŭ, pryčynaj avijakatastrofy staŭ vybuch ručnoj hranaty na borcie, adnak u praŭdzivaści hetaj viersii jość vialikija sumnievy.
Ciapier čytajuć
«Darahija, viesialiciesia, hulajcie i kuraleście. Niachaj na staraść u vas budzie zapas dobrych pieražyvańniaŭ». Apošni hod Śviatłany Kurs — u jaje dopisach1212
Kamientary