Tramp moža pačać vajennuju apieracyju ŭ Mali, dzie znachodzicca «Afrykanski korpus» Pucina

Administracyja prezidenta ZŠA Donalda Trampa razhladaje mahčymaść praviadzieńnia vajennaj apieracyi ŭ Mali suprać terarystyčnaj hrupoŭki JNIM, taksama viadomaj jak «Al-Kaida ŭ Sachieli», paviedamili The Washington Post infarmavanyja krynicy.

Kali hetaje rašeńnie budzie ŭchvalenaje, Mali stanie vośmaj krainaj, pa jakoj ZŠA buduć nanosić udary paśla viartańnia Trampa ŭ Bieły dom. Da hetaha amierykanskija vajskoŭcy nanosili ŭdary pa Jemienie, Samali, Siryi, Iranie, Iraku, Nihieryi i Vieniesuele.

Pry hetym, jak adznačyli surazmoŭcy The Washington Post, siarod vysokapastaŭlenych amierykanskich čynoŭnikaŭ niama adzinstva ŭ hetym pytańni. Aktyŭnym prychilnikam siłavoha varyjantu źjaŭlajecca staršy dyrektar pa pytańniach baraćby z teraryzmam u Saviecie nacyjanalnaj biaśpieki Siebaśćian Horka.

U Biełym domie admovilisia kamientavać mahčymyja płany vajennaj apieracyi ŭ Mali, adnak adznačyli, što teraryzm u Sachieli — vielizarnym paŭpustynnym rehijonie na poŭdzień ad Sachary — źjaŭlajecca «šmatnacyjanalnaj prablemaj».

Aljans dziaržaŭ Sachiela ŭklučaje Mali, Burkina-Faso i Nihier. Va ŭsich hetych krainach u apošnija hady vajskoŭcy zrynuli demakratyčna abranyja ŭrady, razarvali suviazi z Zachadam i źviarnulisia da Rasii pa dapamohu ŭ śfiery biaśpieki. U pryvatnaści, u Mali byŭ nakiravany «Afrykanski korpus», sfarmiravany Ministerstvam abarony Rasii na bazie najmitaŭ z PVK «Vahnier».

Sioleta terarystyčnaja hrupoŭka vybiła rasijskich vajskoŭcaŭ ź niekalkich važnych haradoŭ. Pradstaŭnik administracyi Trampa padkreśliŭ, što Maskva «pakazała svaju nieefiektyŭnaść jak partnior Mali».

«My spadziajomsia, što inšyja afrykanskija krainy zaŭvažać žudasnyja vyniki Rasii ŭ baraćbie z teraryzmam», — skazaŭ amierykanski čynoŭnik.

Pry hetym, jak piša The Washington Post, vajennaja apieracyja ZŠA ŭ Mali moža pryvieści da sutyknieńnia z rasijskimi siłami. Tamu, kab paźbiehnuć mahčymych kanfliktaŭ, Vašynhtonu i Maskvie daviadziecca kaardynavać svaje dziejańni, jak heta adbyvałasia padčas vajny ŭ Siryi, adznačaje vydańnie.

Uviesnu hetaha hoda Ministerstva abarony Rasii zajaŭlała pra sprobu dziaržaŭnaha pieravarotu ŭ Mali, jakuju nibyta arhanizavali «Front vyzvaleńnia Azavada» i JNIM. Pavodle rasijskaha boku, paŭstancy atakavali čatyry bujnyja nasielenyja punkty — stalicu Bamaka, a taksama harady Sievare, Haa i Kidal. Jany taksama sprabavali zachapić prezidencki pałac. U vyniku napadaŭ byŭ zabity ministr abarony Sadyjo Kamara.

U lipieni Hienieralny štab armii Mali paviedamiŭ pra ataki paŭstancaŭ na niekalki haradoŭ, u tym liku Aniefis i Ahielchok na poŭnačy krainy, Haa i Sievare ŭ centralnaj častcy, a taksama Kienijoroba na poŭdni. Paźniej vajskoŭcy zajavili, što adnavili kantrol nad stratehičnymi pazicyjami ŭ Aniefisie, piša Moscow Times.

• 3
• 0
• 3
• 2
• 0
• 0
• 0
• 0