«Jak takoje mahčyma ŭ 2026 hodzie?» Biełarusku aburyŭ vakzał u Baranavičach ź leśvicaj biez pandusa
Maładaja mama raskazała pra ciažkaści, ź jakimi sutyknułasia na čyhunačnym vakzale ŭ Baranavičach. Paśla prybyćcia ciahnika joj daviałosia spuskać dziciačy vazok z płatformy pa vysokaj leśvicy, dzie niama pandusa abo inšaha zručnaha spusku, piša BG.Media.
Žančyna paviedamiła ŭ sacyjalnych sietkach, što była šakavanaja takoj situacyjaj. Pavodle jaje słoŭ, joj pašancavała, što była nie adna — razam ź joj była maci. Adnak abiedźvie mieli vialikija zaplečniki, i dobra, što im pahadziŭsia dapamahčy vypadkovy chłopiec, jaki prachodziŭ pobač.
Biełaruska adznačyła, što nie razumieje, jak padobnaja infrastruktura moža isnavać u 2026 hodzie.
«Da hetaha času nie ŭkładajecca ŭ hałavie, jak takoje moža być u 2026 hodzie! A jak ža ludzi z abmiežavanymi mahčymaściami?» — napisała jana.
Pavodle žančyny, ciahnik byŭ adzinym sposabam dabracca da patrebnaha miesca, tamu skarystacca ź inšaha varyjantu jana nie mahła.
Publikacyja vyklikała šyrokuju reakcyju. Mnohija karystalniki adznačyli, što prablema z hetaj leśvicaj isnuje daŭno i jana źjaŭlajecca adnym z samych niazručnych miescaŭ na biełaruskaj čyhuncy.
Ludzi pisali, što kožny pryjezd u Baranavičy vyklikaje niepakoj:
«Mienavita hetaja leśvica zaŭsiody nahaniaje žach i strach, kali pryjazdžaju ŭ Baranavičy».
«Kožny raz dumaju pra heta, kali padymajemsia ci spuskajemsia z čamadanami i torbami».
«Taksama nie raz ciahnuła čamadan — jašče toj kvest!»
Asabliva składanaj situacyju nazyvajuć zimoj, kali leśvica moža być ślizkaj. Karystalniki taksama pryvodzili prykłady, kali prablemy ŭźnikali ŭ ludziej ź invalidnaściu.
Adna z žančyn raskazała, što paśla avaryi dapamahała znajomamu dabracca da ciahnika: niechta nios mylicy, niechta — rečy, a niechta dapamahaŭ samomu čałavieku. Samastojna pieraadoleć taki šlach jamu było niemahčyma.
Prablema tyčycca nie tolki baćkoŭ ź dziciačymi vazkami. Udzielniki abmierkavańnia adznačyli, što adsutnaść biezbarjernaha asiarodździa stvaraje ciažkaści dla pažyłych ludziej, pasažyraŭ ź ciažkimi čamadanami i ludziej z abmiežavanaj mabilnaściu.
Niekatoryja paraŭnoŭvali situacyju ź inšymi vakzałami, dzie taksama niama zručnych pierachodaŭ i liftaŭ.
Razam z tym adzin z karystalnikaŭ paviedamiŭ, što paźbiehnuć leśvicy ŭsio ž možna: kala płatformy zvyčajna znachodzicca dziažurny pa stancyi, jaki moža pravieści pasažyraŭ praz słužbovy prachod. Inšyja ŭdakładnili, što isnuje prachod praz domik dziažurnaha i śpiecyjalnaja darožka praz čyhunačnyja šlachi.
Adnak mnohija zaŭvažyli, što nie ŭsie pasažyry viedajuć pra takuju mahčymaść. Akramia taho, ludzi ličać, što słužbovyja prachody nie pavinny zamianiać paŭnavartasnuju biezbarjernuju infrastrukturu na vakzale.
Ciapier čytajuć
«Darahija, viesialiciesia, hulajcie i kuraleście. Niachaj na staraść u vas budzie zapas dobrych pieražyvańniaŭ». Apošni hod Śviatłany Kurs — u jaje dopisach88
Kamientary