Na karybskim pryvatnym vostravie ažaniŭsia najpapularniejšy jutubier u śviecie
Amierykanski stvaralnik kantentu MrBeast, sapraŭdnaje imia jakoha Džymi Donaldsan, ažaniŭsia sa svajoj niaviestaj Tejaj Bujsen. Pavodle paviedamleńniaŭ amierykanskich ŚMI, viasielle adbyłosia na pryvatnym vostravie Niekier, jaki naležyć brytanskamu miljarderu Ryčardu Brensanu. Vostraŭ znachodzicca na Brytanskich Virhinskich astravach, piša Bi-bi-si.
28‑hadovy jutubier paviedamiŭ pra šlub u sumiesnaj publikacyi z žonkaj u Instagram. Para apublikavała fatahrafii ź viasielnaha dnia i napisała, što jon «znajšoŭ MrsBeast».
MrBeast ličycca samym papularnym jutubieram u śviecie. Jahony kanał maje bolš za 509 miljonaŭ padpisčykaŭ.
Donaldsan zrabiŭ prapanovu Tei Bujsen na Kalady 2024 hoda. Tady jany byli ŭ adnolkavych śviatočnych švedrach z łahatypam MrBeast. Raniej jutubier raskazvaŭ časopisu People, što chacieŭ zrabić prapanovu ŭ całkam pryvatnaj i intymnaj atmaśfiery, a samo viasielle pravieści ścipła, niahledziačy na svaju suśvietnuju viadomaść.
Na apublikavanych zdymkach bačna, što Bujsen u dzień viasiella była ŭ doŭhaj karunkavaj sukiency z kvietkavym uzoram, a Donaldsan apranuŭ bieły smokinh. Na praciahu śviatkavańnia niaviesta niekalki razoŭ mianiała ŭbory: dla razrazańnia viasielnaha torta jana vybrała biełuju karotkuju sukienku ź bliskučym viercham i spadnicaj, azdoblenaj pierjem, a na viečarovuju častku śviata — atłasnuju sukienku z adkrytymi plačyma.
MrBeast nazvaŭ hety dzień «najlepšym dniom u svaim žyćci».
Džymi Donaldsan atrymaŭ suśvietnuju viadomaść dziakujučy virusnym videa, maštabnym ekśpierymientam, rozyhryšam i spabornictvam ź vialikimi hrašovymi pryzami. U svaich videa jon časta razdaje značnyja sumy hrošaj udzielnikam i nieznajomym ludziam.
Akramia YouTube, jon udzielničaŭ u stvareńni realici-šou Beast Games dla płatformy Prime Video. Prahrama była natchnionaja papularnym sieryjałam Netflix «Hulnia ŭ kalmara». Udzielniki šou spaborničajuć za hałoŭny pryz u pamiery 5 miljonaŭ dalaraŭ.
Teja Bujsen rodam z Paŭdniovaj Afryki. Jana taksama viadzie ŭłasny YouTube-kanał TheaBeasty, jaki maje kala 140 tysiač padpisčykaŭ. MrBeast, akramia taho, pravodzić papularnyja hulniavyja tranślacyi na płatformie Twitch.
Pry hetym karjera Donaldsana nie abyšłasia biez skandałaŭ. Były supracoŭnik jaho miedyjakampanii Beast Industries padaŭ u sud, abvinavaciŭšy kampaniju ŭ seksualnych damahańniach i dyskryminacyi pa hiendarnaj prykmiecie na pracoŭnym miescy.
Taksama ŭdzielniki šou Beast Games źviartalisia z pazovami adnosna ŭmoŭ udziełu ŭ prajekcie. Akramia taho, MrBeast sutykaŭsia z abvinavačvańniami ŭ tym, što niekatoryja jaho virusnyja konkursy i rozyhryšy mahli być zahadzia pastaŭlenymi.
«Zakuliśsie»: 20‑hadovy jutubier biez kinošnaj adukacyi źniaŭ film, jaki ŭsie abmiarkoŭvajuć i łamajuć hałavu nad razhadkaj
Tanny chorar «Absesija» amierykanskaha jutubiera staŭ hałoŭnym chitom prakatu
«U siamji razmaŭlajem kožny na rodnaj movie». Zasnavalnica biełaruskaj inicyjatyvy «Hodna» vyjšła za ŭkrainskaha jutubiera
Stryminhavyja hihanty robiać staŭku na YouTube-zorak
Kamientary
NN, nazirajcie dalej. Dziakuj. )