На карыбскім прыватным востраве ажаніўся найпапулярнейшы ютубер у свеце
Амерыканскі стваральнік кантэнту MrBeast, сапраўднае імя якога Джымі Дональдсан, ажаніўся са сваёй нявестай Тэяй Буйсэн. Паводле паведамленняў амерыканскіх СМІ, вяселле адбылося на прыватным востраве Некер, які належыць брытанскаму мільярдэру Рычарду Брэнсану. Востраў знаходзіцца на Брытанскіх Віргінскіх астравах, піша Бі-бі-сі.
28‑гадовы ютубер паведаміў пра шлюб у сумеснай публікацыі з жонкай у Instagram. Пара апублікавала фатаграфіі з вясельнага дня і напісала, што ён «знайшоў MrsBeast».
MrBeast лічыцца самым папулярным ютуберам у свеце. Ягоны канал мае больш за 509 мільёнаў падпісчыкаў.
Дональдсан зрабіў прапанову Тэі Буйсэн на Каляды 2024 года. Тады яны былі ў аднолькавых святочных швэдрах з лагатыпам MrBeast. Раней ютубер расказваў часопісу People, што хацеў зрабіць прапанову ў цалкам прыватнай і інтымнай атмасферы, а само вяселле правесці сціпла, нягледзячы на сваю сусветную вядомасць.
На апублікаваных здымках бачна, што Буйсэн у дзень вяселля была ў доўгай карункавай сукенцы з кветкавым узорам, а Дональдсан апрануў белы смокінг. На працягу святкавання нявеста некалькі разоў мяняла ўборы: для разразання вясельнага торта яна выбрала белую кароткую сукенку з бліскучым верхам і спадніцай, аздобленай пер'ем, а на вечаровую частку свята — атласную сукенку з адкрытымі плячыма.
MrBeast назваў гэты дзень «найлепшым днём у сваім жыцці».
Джымі Дональдсан атрымаў сусветную вядомасць дзякуючы вірусным відэа, маштабным эксперыментам, розыгрышам і спаборніцтвам з вялікімі грашовымі прызамі. У сваіх відэа ён часта раздае значныя сумы грошай удзельнікам і незнаёмым людзям.
Акрамя YouTube, ён удзельнічаў у стварэнні рэаліці-шоу Beast Games для платформы Prime Video. Праграма была натхнёная папулярным серыялам Netflix «Гульня ў кальмара». Удзельнікі шоу спаборнічаюць за галоўны прыз у памеры 5 мільёнаў даляраў.
Тэя Буйсэн родам з Паўднёвай Афрыкі. Яна таксама вядзе ўласны YouTube-канал TheaBeasty, які мае каля 140 тысяч падпісчыкаў. MrBeast, акрамя таго, праводзіць папулярныя гульнявыя трансляцыі на платформе Twitch.
Пры гэтым кар'ера Дональдсана не абышлася без скандалаў. Былы супрацоўнік яго медыякампаніі Beast Industries падаў у суд, абвінаваціўшы кампанію ў сэксуальных дамаганнях і дыскрымінацыі па гендарнай прыкмеце на працоўным месцы.
Таксама ўдзельнікі шоу Beast Games звярталіся з пазовамі адносна ўмоў удзелу ў праекце. Акрамя таго, MrBeast сутыкаўся з абвінавачваннямі ў тым, што некаторыя яго вірусныя конкурсы і розыгрышы маглі быць загадзя пастаўленымі.
«Закуліссе»: 20‑гадовы ютубер без кіношнай адукацыі зняў фільм, які ўсе абмяркоўваюць і ламаюць галаву над разгадкай
Танны хорар «Абсэсія» амерыканскага ютубера стаў галоўным хітом пракату
«У сям'і размаўляем кожны на роднай мове». Заснавальніца беларускай ініцыятывы «Годна» выйшла за ўкраінскага ютубера
Стрымінгавыя гіганты робяць стаўку на YouTube-зорак
Цяпер чытаюць
Латвія «па тэхнічных прычынах» закрыла мяжу з Беларуссю15
Каментары
НН, назірайце далей. Дзякуй. )