Цэны на кватэры ў «Мінск-Свеце» падаюць, а ў Мінску — растуць. Сумныя перспектывы для раёна?
На рынку сталічнай нерухомасці назіраецца анамалія.
Горад у горадзе
Сярэдні кошт метра ў сталіцы працягвае расці. Паводле даных Realt.by, па стане на 20 верасня метр у Мінску па прапановах каштуе $2525.
Пры гэтым назіраецца цікавая тэндэнцыя — цэны на кватэры ў «Мінск-Свеце», наадварот, падаюць на працягу ўсяго верасня. Толькі за апошні тыдзень квадрат па прапановах там патаннеў на 3,2%.
У той час, як агулам па Мінску за гэты перыяд цэны ў аб'явах падраслі на 1,5%.
Паралельна з тым, як квадрат у «Мінск-Свеце» пачаў таннець, расце колькасць прапаноў у гэтым раёне. За кароткі час кватэр у продажы пабольшала на траціну.
Чаму так адбываецца і чаго чакаць далей?
Галоўнай прычынай, чаму цэны ў гэтым мікрараёне пачалі прасядаць, сапраўды можа быць павелічэнне прапаноў пасля здачы ў эксплуатацыю чарговых будынкаў.
Калі колькасць ахвотных набыць там жытло застаецца стабільнай, а колькасць ахвотных прадаць кватэру расце, то па законе попыту і прапановы цэны мусяць ісці ўніз, бо прадаўцам даводзіцца змагацца за пакупніка.
З улікам таго, што «Мінск-Свет» усё яшчэ працягвае забудоўвацца, хоць і падыходзіць да завяршэння, тэндэнцыя са зніжэннем цэн можа мець працяг.
Многія куплялі і працягваюць набываць кватэры ў «Мінск-Свеце» як інвестыцыю, а не як жытло, куды плануюць пераехаць самі. На фоне таго, як квадрат у Мінску цягам апошніх гадоў даражэў, абнаўляючы рэкорды, купля кватэры на этапе будаўніцтва як інвестыцыя сапраўды з'яўляецца выгаднай задумай.
Аднак у выпадку з «Мінск-Светам» колькасць патэнцыйных інвестыцыйных кватэр у раёне вялікая. І ўлічваючы, што цэны цяпер на піку, многія могуць пачаць спяшацца прадаць кватэру па высокім кошце, што таксама ўплывае на колькасць прапаноў.
Асобна можна вылучыць перапродаж бізнэс-апартаментаў — жытла новага для Беларусі юрыдычнага фармату, якое па факце з'яўляецца звычайнымі кватэрамі з самым танным метрам, але з нюансамі, да якіх многія былі не гатовыя. Сярод іх — больш высокая камуналка, чым у звычайных кватэрах, а таксама складанасці з узвядзеннем сцен і іншых змен, да якіх першасныя пакупнікі былі не гатовыя.
Гэта таксама магло стаць дадатковым стымулам да таго, каб выставіць кватэру (бізнэс-апартаменты) на продаж. Падрабязней пра такой фармат нерухомасці «Наша Ніва» пісала раней.
Цяпер чытаюць
Дэпутат Клішэвіч стаў кандыдатам гістарычных навук з дысертацыяй пра разлажэнне беларускага камсамола ў часы «перабудовы»4
Каментары
Чарговая бязглуздзіца асабліва разумнікаў.
Тым больш што ў дадзеным выпадку слова мір у назве раёна можа азначаць не толькі свет, а гэтак жа сама і мір (калі каму незразумела, дык удакладню - паміж народамі і ва ўсім свеце).