Упаў з лесвіцы і разбіўся насмерць расійскі тэлевядучы Сяргей Саседаў
Саседаў працаваў членам журы беларускага «Фактар Бай». Ён быў адкрытым геем і — што самае прыкрае — прыхільнікам Уладзіміра Пуціна.
23 верасня ва ўзросце 58 гадоў памёр расійскі журналіст, музычны крытык і тэлевядоўца Сяргей Саседаў. Пра яго смерць паведамілі расійскія СМІ са спасылкай на прапагандыста Вадзіма Такмянёва.
Паводле гэтых паведамленняў, прычынай смерці стаў няшчасны выпадак. Падчас гастроляў у якуцкім Нерунгры Саседаў упаў з лесвіцы. У выніку атрыманай траўмы ў яго развіўся ацёк мозгу.
Папулярнасць Сяргей Саседаў атрымаў пасля ўдзелу ў тэлепраграме «Акулы пяра». Ён таксама быў членам журы музычных праектаў «Х-фактар» і «Суперстар! Вяртанне», а таксама вёў ток-шоу «За гранню» на тэлеканале НТВ.
Як і вельмі многія іншыя расійскія публічныя асобы са сферы шоу-бізнэсу, Сяргей Саседаў быў прыхільнікам Уладзіміра Пуціна і ягонай імперскай палітыкі. Пасля анексіі Крыма ён выступаў з праўладнай рыторыкай, рабіў украінафобскія заявы і адмоўна выказваўся пра расіян, якія эмігравалі з краіны пасля пачатку поўнамаштабнай вайны Расіі супраць Украіны.
Праўда, у апошнія гады жыцця Саседаў разышоўся ў поглядах з рэжымам Лукашэнкі. Раней ён каля 20 разоў прыязджаў на «Славянскі базар» у Віцебску, але ў 2021 годзе яму забаранілі ўезд у Беларусь. Прычыну гэтага ўлады не патлумачылі. Сам Саседаў звязваў гэта з палітычнай сітуацыяй і сваёй адмовай працаваць у беларускай версіі X-Factor.
Пасля забароны Саседаў заявіў, што больш не будзе прыязджаць у Беларусь, пакуль кіруе цяперашняя ўлада. Ён таксама сказаў, што яму шкада Беларусь і беларусаў, якіх назваў цудоўнымі, чыстымі, наіўнымі і вельмі даверлівымі людзьмі, якія сталі ахвярамі жорсткай тыраніі.
Каментары