Słuč u Słucku tak zarasła, što płyni miescami ŭžo amal i nie vidać
Žychary Słucka ŭsio čaściej skardziacca na zarastańnie raki Słuč, ad jakoj horad atrymaŭ nazvu. U niekatorych miescach płyń užo amal nie vidać, a rasčyścić rečyšča ŭłasnymi siłami zanadta doraha, piša BG.Media.
Žycharka Słucka apublikavała paviedamleńnie, u jakim źviarnuła ŭvahu na stan raki Słuč u rajonie vulicy Viečarkieviča. Na jaje dumku, vadajom pastupova zarastaje, a biez rasčystki situacyja budzie tolki paharšacca.
«Račułka patrochu pieratvarajecca ŭ bałota. Uzimku, kali lod byŭ tryvałym, my navat sami sprabavali krychu rasčyścić, ale, na maju dumku, usio treba prybirać razam z karaniami. My daviedvalisia, kolki budzie kaštavać zrabić heta svaimi siłami chacia b na našaj vulicy — atrymlivajecca vielmi doraha. Nabiarežnuju jašče krychu padtrymlivajem sami. Praz zaraśniki ŭžo navat płyni nie vidać», — raskazała słuččanka.
U kamientarach mnohija adznačyli, što zarastańnie Słučy možna nazirać i na inšych učastkach.
Niekatoryja pišuć, što prablema ŭžo daŭno vychodzić za miežy adnaho rajona:
«Usim abyjakava. Nabiarežnuju pakosiać, a hetyja łapuchi prosta puskajuć pa płyni. Za miedvučyliščam tam uvohule nie prajści — usio zarasło».
Inšyja źviartajuć uvahu na situacyju ŭ inšaj častcy Słucka.
«U rajonie Navadvorcaŭ raka chutka pieratvorycca ŭ ručaj — taksama mocna zarasła, płyni amal niama».
Byli i tyja, chto źviazaŭ situacyju z bolš šyrokimi ekałahičnymi pracesami:
«Paśla mielijaracyi amal źniščyli mnohija reki, a drobnyja i zusim źnikli. Ciapier treba znoŭ zabałočvać terytoryi, inakš zasuchi buduć tolki čaściejšymi».
Heta ŭžo nie pieršy vypadak, kali miascovyja žychary źviartajuć uvahu na stan Słučy. Raniej paviedamlała pra skarhi žycharoŭ vioski Pracavičy Słuckaha rajona na zabrudžvańnie stararečča Słučy.
Miascovyja žychary tady śćviardžali, što vada ŭ vadajomie prykmietna pahoršyłasia, a prablema nie vyrašajecca, niahledziačy na šmatlikija zvaroty. Kab pryciahnuć uvahu da situacyi, jany navat zapisali videazvarot.
Pravierki Słuckaj rajonnaj inśpiekcyi pryrodnych resursaŭ paćvierdzili pieravyšeńnie dapuščalnych kancentracyj šerahu zabrudžvalnych rečyvaŭ.
Asnoŭnaj pryčynaj nazvali mocna znošanyja ačyščalnyja zbudavańni, pabudavanyja jašče ŭ 1970‑ch hadach. Pavodle dziaržSMI, ich rekanstrukcyju płanujuć zaviaršyć tolki da 2029 hoda ŭ miežach prahramy «Kamfortnaje žyllo i spryjalnaje asiarodździe».
Ciapier čytajuć
Prapahanda pryčapiłasia da «darahoha» hadzińnika Łatuški. Toj raskazaŭ, što heta za madel nasamreč9
Kamientary