U Pskovie rasijanin zabiŭ biełarusa Valeryja za toje, što toj patrabavaŭ pavažać biełaruskuju nacyju

49‑hadovy biełarus Valeryj (proźvišča nieviadoma) žyŭ u rasijskim Pskovie ŭžo daŭno, jašče z 1990-ch. Pierabraŭsia tudy adrazu paśla škoły. Apošnim časam Valeryj žyŭ u svajho trajuradnaha brata, padzarablaŭ na budoŭlach. Znajomyja apisvali jaho jak dobraha i spahadlivaha čałavieka, schilnaha, praŭda, da złoŭžyvańnia ałkaholem. U Biełarusi ŭ jaho zastalisia maci, baćka i brat.

U Rasii Valeryj zachoŭvaŭ svaju biełaruskuju identyčnaść i navat ličyŭ siabie nacyjanalistam. Adnak ničoha radykalnaha za hetym nie stajała. Jak patłumačyŭ u sudzie jaho brat, nacyjanalistyčnyja pohlady Valeryja byli biaskryŭdnymi i zvodzilisia da śćviardžeńniaŭ pra abaviazak inšych nacyj pavažać biełaruskuju nacyju.

Adnak navat heta ŭ vyniku pryviało da biady.

Trahiedyja razyhrałasia ŭ noč na 5 sakavika 2024 hoda ŭ adnym z pskoŭskich internataŭ. 39‑hadovy miascovy žychar Alaksandr Juruš, jaki razam ź biełarusam pracavaŭ na budoŭli, čarhovy raz pryčapiŭsia da jaho.

Jašče za niekalki miesiacaŭ da taho jon kazaŭ bratu Valeryja, što ŭ taho «doŭhi jazyk» i što kali-niebudź jon jaho za heta «prybje».

Tak i zdaryłasia. Pozna ŭviečary 4 sakavika pjany Juruš išoŭ praviedać znajomaha, jaki žyŭ u susiednim pakoi. U kalidory piataha paviercha jon sutyknuŭsia z Valeryjem — taksama pjanym. Uspychnuŭ kanflikt: pavodle pakazańniaŭ Juruša, praz raniejšyja «nacyjanalistyčnyja vykazvańni» biełarusa. Juruš dvojčy ŭdaryŭ Valeryja kułakom pa hałavie, toj upaŭ, a Juruš pajšoŭ u pakoj da znajomaha.

Praź niekalki chvilin tudy ž zajšoŭ Valeryj — i, jak skazana ŭ prysudzie, «staŭ nastojvać na svaim pravie być nacyjanalistam». Śviedki, jakija vypivali ŭ pakoi, raskazali: Juruš kryčaŭ na Valeryja, nazyvajučy jaho «nacystam» i «fašystam», a potym pačaŭ źbivać — kułakami i nahami pa hałavie i tułavie, nie mienš za 15 udaraŭ za try-piać chvilin.

Pjany Valeryj navat nie supraciŭlaŭsia. Žančyna, haspadynia pakoja, sprabavała spynić źbićcio, ale Juruš, sychodziačy, schapiŭ draŭlanuju taburetku i z usioj siły ŭdaryŭ joju Valeryja pa hałavie — ekśpiertyza potym naličyła nie mienš za try takija ŭdary.

Pavialičyć

Paśla bojki, jak ni dzika heta hučyć, Valeryj paprasiŭ prabačeńnia, vypiŭ čarku harełki i loh spać na padłohu kala dyvana. Ad vykliku chutkaj admoviŭsia. Sabutelniki nakryli jaho koŭdraj. Pračnuŭšysia viečaram nastupnaha dnia, kampanija zrazumieła, što biełarus miortvy. Jon pamior tam ža, na padłozie, ad zakrytaj čerapna-mazhavoj traŭmy — krovaźlićcia pad ćviorduju mazhavuju abałonku. Ekśpierty naličyli na jaho ciele ślady nie mienš čym 21 traŭmatyčnaha ŭździejańnia.

Asobu zahinułaha palicyja vyznačyła pa daviedcy ab stracie dakumientaŭ, jakaja lažała ŭ jaho ŭ kišeni. Brat daviedaŭsia pra śmierć Valeryja z navin u internecie — u paviedamleńni zhadvałasia, što zahinuŭ hramadzianin Biełarusi, — i sam patelefanavaŭ u palicyju. Mienavita jon apaznaŭ cieła, arhanizavaŭ jaho dastaŭku ŭ Biełaruś i prysutničaŭ na pachavańni: baćki Valeryja pryjechać u Rasiju nie zmahli praz uzrost i stan zdaroŭja.

Juruš vinu pryznaŭ całkam, napisaŭ jaŭku z pavinnaj i ŭ sudzie zrabiŭ vyhlad, što raskajvajecca.

12 lutaha 2025 hoda Jurušu vynieśli kančatkovy prysud — 8 hadoŭ 8 miesiacaŭ kałonii strohaha režymu za naŭmysnaje pryčynieńnie ciažkaj škody zdaroŭju, jakaja paciahnuła śmierć (č. 4 art. 111 KK RF). Bratu zahinułaha sud prysudziŭ kala $4000 kampiensacyi, choć toj prasiŭ utraja bolš.

Zrešty, da kałonii zabojca tak i nie dajechaŭ. Užo praz tydzień paśla prysudu jaho ŭračysta adpraŭlali na front.

«Treba abaraniać svaju radzimu. U mianie tam vajujuć braty. I sam taksama chaču. Ja taksama pavinien abaraniać svaju radzimu, kožny mužčyna pavinien jaje abaraniać. Jak by kali ŭ jaho jość takaja mahčymaść», — zajaviŭ budučy akupant.

U aficyjnych śpisach zahinułych imieni Alaksandra Juruša pakul što niama.

Pavialičyć

• 0
• 0
• 1
• 15
• 6
• 1
• 46
• 0