Žychar Babrujska znajšoŭ u kvatery svajho dziadźki antykvarnuju zbroju
U Babrujsku 22‑hadovy mužčyna źviarnuŭsia ŭ milicyju paśla taho, jak znajšoŭ u kvatery svajho dziadźki try pistalety i bojeprypasy. Vyśvietliłasia, što dziadźka doŭhi čas tajemna zachoŭvaŭ zbroju jak siamiejnuju relikviju, jakaja dastałasia jamu ŭ spadčynu ad dzieda, paviedamlaje Dziaržaŭny kamitet sudovych ekśpiertyz.
Supracoŭniki milicyi ahledzieli kvateru, kanfiskavali zbroju i patrony, paśla čaho pieradali ich na sudovuju balistyčnuju ekśpiertyzu va ŭpraŭleńnie Dziaržaŭnaha kamiteta sudovych ekśpiertyz pa Mahiloŭskaj vobłaści.
Ekśpierty ŭstanavili, što ŭsie try pistalety źjaŭlajucca sapraŭdnaj ahniastrelnaj naraznoj zbrojaj zavodskaj vytvorčaści i prydatnyja dla stralby. Havorka idzie pra 6, 35‑mm pistalet sistemy Karovina, 9‑mm niamiecki pistalet Borchardt-Luger (Parabellum P08) i 7, 65‑mm pistalet Mauser madeli 1914 hoda.
Dva niamieckija pistalety šyroka vykarystoŭvalisia padčas Druhoj suśvietnaj vajny. Pistalet Karovina staŭ pieršym sieryjnym savieckim samazaradnym pistaletam, raspracavanym u 1926 hodzie. Jon pastupaŭ na ŭzbrajeńnie supracoŭnikaŭ NKVD SSSR, kamandnaha składu Čyrvonaj armii, a taksama dziaržaŭnych i partyjnych rabotnikaŭ.
Niahledziačy na značny ŭzrost, usie try ŭzory dobra zachavalisia i zastalisia spraŭnymi. Akramia taho, ekśpierty pryznali prydatnymi dla vykarystańnia i siem kanfiskavanych patronaŭ, jakija taksama byli zavodskaj vytvorčaści.
Pa fakcie niezakonnaha zachoŭvańnia zbroi pravodzicca pravierka supracoŭnikami Pieršamajskaha rajonnaha adździeła milicyi Babrujska.
Minčanka Anhielina, jakaja prasiła ŭ Łukašenki kvateru za trojniu, atrymała žyllo18
Kamientary