U noč na 27 lipienia, pavodle paviedamleńnia ŭkrainskaha boku, padraździaleńni Sił abarony Ukrainy nanieśli sieryju ŭdaraŭ pa abjektach, jakija vykarystoŭvajucca Rasijaj dla viadzieńnia bajavych dziejańniaŭ i vajennaj łahistyki.
Paviedamlajecca, što ŭ Rastovie-na-Donie parazili ekspartny terminał. Pavodle infarmacyi ŭkrainskaha boku, paśla trapleńnia na abjekcie ŭźnik pažar.
Taksama, jak śćviardžajecca, byŭ vyviedzieny sa stroju naziemny retranślatar, pryznačany dla kiravańnia ŭdarnymi bieśpiłotnikami typu «Hierań» i «Hierbiera», u rajonie Žaleznaha Porta Chiersonskaj vobłaści. U paviedamleńni adznačajecca, što hety retranślatar vykarystoŭvaŭsia dla pavieličeńnia dalokaści dziejańnia, ustojlivaści suviazi i efiektyŭnaści kiravańnia bieśpiłotnymi latalnymi aparatami, jakija prymianiajucca dla ŭdaraŭ pa terytoryi Ukrainy.
Akramia taho, pavodle infarmacyi ŭkrainskaha Hienštaba, byŭ naniesieny ŭdar pa aŭtamabilnym moście praz Hieničeski praliŭ u Chiersonskaj vobłaści. Ukrainskija vajskoŭcy śćviardžajuć, što hety most vykarystoŭvajecca rasijskimi vojskami dla vajennaj łahistyki na akupavanaj častcy poŭdnia Ukrainy.
Taksama paviedamlajecca pra paražeńnie ramontnaha padraździaleńnia rasijskich vojskaŭ u Kadzijeŭcy na Łuhanščynie, składa paliŭna-zmazačnych materyjałaŭ u pasiołku Siamiejkina Łuhanskaj vobłaści i składa materyjalna-techničnych srodkaŭ u Pieravalnym u akupavanym Krymie.
Pavodle paviedamleńniaŭ rasijskaha boku, u Rastovie-na-Donie ŭkrainski bieśpiłotnik unačy trapiŭ u šmatpaviarchovy dom. U vyniku ataki ŭ horadzie zahinuli piać čałaviek, jašče vosiem čałaviek atrymali ranieńni.
Kiraŭnik Rastoŭskaj vobłaści Juryj Ślusar spačatku paviedamiŭ pra zahinułych žonku i muža, a trochi paźniej pra toje, što byli znojdzieny zahinułymi jašče try čałavieki — dvoje darosłych i adno dzicia. Ich vyjavili ratavalniki pry razbory zavałaŭ šmatkvaternaha doma, jaki paciarpieŭ u vyniku traplańnia bieśpiłotnika.
Ciapier čytajuć
«Strelba kali i strelić, to naŭrad ci kulamiotnaj čarhoj». Maksim Znak acaniŭ realnaść pahroz biełaruskaj prapahandy pazbavić hramadzianstva palitemihrantaŭ1212
Kamientary