«Budzie niavažna, demakratyčnaje kiravańnie ŭ Biełarusi ci nie». Leŭ Lvoŭski raskazaŭ, čamu maładych biełarusaŭ čakaje horkaja dola

Hałoŭnaja prablema, jakaja zakładaje minu pad ekanomiku Biełarusi, — heta suadnosiny ludziej pracazdolnaha ŭzrostu i tych, kaho treba karmić. Jak adznačaje Lvoŭski, zaraz situacyja jašče adnosna stabilnaja: na 10 rabotnikaŭ prypadaje 4 piensijaniery. Adnak hety bałans imkliva razburajecca.

Užo da siaredziny stahodździa hetaja ličba vyraście minimum u paŭtara raza. Heta aznačaje, što na 10 pracazdolnych biełarusaŭ budzie prypadać 6—7 piensijanieraŭ. Takaja nahruzka niepaźbiežna laža na plečy moładzi, jakoj daviadziecca zabiaśpiečvać starejšaje pakaleńnie ŭ vielmi niespryjalnych umovach.

«Jakaja b u nas tam ni była piensijnaja sistema, kamuści treba karmić piensijanieraŭ. Heta ŭsio budzie kłaścisia na maładych. Takaja ž situacyja budzie adbyvacca va ŭsich susiednich krainach», — davodzić Lvoŭski.

Rost kolkaści piensijanieraŭ pryviadzie da taho, što dziaržavie spatrebicca bolš hrošaj na sacyjalnyja vypłaty. Adziny šlach atrymać hetyja srodki — pavyšać padatki dla tych, chto pracuje. U vyniku heta pryviadzie da realnaha źbiadnieńnia maładoha pakaleńnia.

U toj ža čas susiednija krainy, jakija sutyknucca z padobnymi prablemami, mohuć pačać ahresiŭnuju kankurencyju za čałaviečy kapitał:

«Jakaja-niebudź kraina moža prydumać niachitry płan, abviaścić: «Pryjazdžajcie da nas u krainu i budziecie płacić nie 60% padatkaŭ, jak u vas u krainie, a 10%». Takim čynam, hetaja kraina sapraŭdy zmoža sabrać u siabie šmat moładzi, vypravić svaje demahrafičnyja prablemy i abkładać hetuju moładź značna mienšym padatkam».

U taki momant moładź moža sapraŭdy «masava niekudy biehčy». Jak ličyć ekanamist, roźnica va ŭzroŭni žyćcia pamiž Biełaruśsiu i susiedziami ŭžo ciapier značnaja, a da siaredziny stahodździa, z ulikam vielizarnaj padatkovaj nahruzki, jana moža stać jašče ŭ niekalki razoŭ bolšaj.

«I tady ŭžo budzie niavažna, demakratyčnaje kiravańnie ŭ Biełarusi ci nie, dobryja tam ludzi ci drennyja, razmaŭlajuć na biełaruskaj movie ci na ruskaj. Budzie važna, što hety małady čałaviek moža pierajechać u susiedniuju krainu i žyć tam litaralna ŭ try, u čatyry razy lepš. I dalej užo amal nijakaha patryjatyzmu nie chopić, kab utrymlivać ludziej u krainie», — prahnazuje ekanamist.

Jak davodzić Lvoŭski, niahledziačy na vidavočnyja niehatyŭnyja trendy ŭ adukacyi, miedycynie i pastajanny adtok kadraŭ, ciapierašniaje kiraŭnictva krainy nie robić krokaŭ dla vypraŭleńnia situacyi. Ciapierašni ŭrad nie źbirajecca adkazvać za svaje ŭčynki ŭ pierśpiektyvie siaredziny stahodździa.

Dla Alaksandra Łukašenki, jaki, jak zaŭvažaje Lvoŭski, nie źbirajecca žyć da siaredziny XXI stahodździa, važna zachavać svaju padušku biaśpieki siońnia. Pry hetym jahonaje žadańnie zastavacca va ŭładzie lubym koštam sistematyčna źmianšaje pierśpiektyvy krainy na dziesiacihodździ napierad. 

«Ale ja nie dumaju, što Alaksandr Łukašenka za heta pieražyvaje», — zaŭvažaje ekśpiert.

• 19
• 1
• 6
• 4
• 1
• 10
• 0
• 0