Ci praviaduć mietro ŭ «Paŭnočny bierah» i jak rekanstrujujuć Daŭhinaŭski trakt. Jakija pieramieny čakajuć Centralny rajon stalicy
Jakim budzie najbolš praciahły puciepravod, ci praviaduć mietro ŭ «Paŭnočny bierah», i jak rekanstrujujuć Daŭhinaŭski trakt? Pra pieramieny, jakija čakajuć Centralny rajon, piša «Minsk-Naviny».
Žyllo
Płanujecca, što da 2045 hoda kolkaść nasielnictva rajona pavialičycca na 100 tys. čałaviek. Hetamu paspryjaje žyllovaje budaŭnictva.
Asnoŭnyja placoŭki zabudovy — miežy vuł. Arłoŭskaj — Haja — Ščadryna, sa znosam damoŭ siadzibnaha typu. A taksama ŭźviadzieńnie ŽK «Paŭnočny Bierah», dzie praduhledžana stvaryć kala 4 młn kv.m. žylla.
Paralelna tam idzie budaŭnictva vulična-darožnaj sietki i abjektaŭ sacyjalnaha pryznačeńnia. U žyłym kompleksie raźmieściać dźvie elektryčnyja padstancyi, dziakujučy čamu ŭ 80% novych budynkaŭ aciapleńnie i padahreŭ vady buduć ažyćciaŭlacca pry dapamozie elektryčnaści.
Tam ža, na skryžavańni vuł. Vyhockaha i P. Miadziołki, uzvodziać dva vialikija šmatkvaternyja damy dla tych, chto maje patrebu ŭ palapšeńni žyllovych umoŭ, i šmatdzietnych siemjaŭ. Adzin zdaduć u kancy hetaha hoda, druhi — u pieršym kvartale 2027-ha.
Akramia taho, u rajonie vuł. Navavilenskaj budujuć ŽK «Levada», jaki płanujecca całkam zdać za najbližejšyja try hady.
Viaduć i kapitalny ramont staroha žyllovaha fondu. U 2025‑m abnavili bolš za 77 tysiač kv.m. u 18 damach. U 2026 hodzie praduhledžana adramantavać 16 damoŭ ahulnaj płoščaj 62 tysiač kv.m.
Uparadkavańnie
— Praduhledžana finansavańnie z pavieličeńniem abjomu dla biahučaha ramontu vulična-darožnaj sietki. U 2025‑m na vaśmi vulicach zamianili vierchni płast asfaltu, — raskazaŭ kiraŭnik administracyi Centralnaha rajona Valeryj Varanicki.
Aproč hetaha, pryniata rašeńnie zamiest štohadovaha jamačnaha ramontu całkam pamianiać pakryćcio na dvarovych terytoryjach. Takim čynam u minułym hodzie ŭparadkavali 120 dvaroŭ.
Darohi i estakady
Zhodna z Hienieralnym płanam, vuł. Navavilenskuju praciahnuć da MKAD. Kab paźbiehnuć zatoraŭ, jaje pašyrać da troch pałos u kožnym kirunku. Paralelna abstalujuć sučasnyja piešachodnyja zony ź vieładarožkami. Realizacyja prajekta paznačanaja na najbližejšyja niekalki hadoŭ.
A voś da rekanstrukcyi Daŭhinaŭskaha i Staravilenskaha traktaŭ užo prystupili. Pieršy pašyrajuć ad zavułka Čarviakova i praciahvajuć da praśpiekta Mašerava. Na Staravilenskim pieranosiać tramvajnaje kalco.
Raboty raźbityja na try etapy. Pieršy ŭžo realizavany: dyśpietčarskaja stancyja «Voziera» pajšła ŭ historyju, a razvarotnaje kalco abstalavali za pałacam dziaciej i moładzi. Druhi etap — pašyreńnie ŭčastka darohi pa linii isnych tramvajnych rejek. U finale zojmucca rekanstrukcyjaj skryžavańnia vuł. Arłoŭskaj i Daŭhinaŭskaha traktu, uklučajučy raźviazki i novyja źjezdy, źviazanyja z budaŭnictvam novych stancyj mietro.
Na ŭčastku Staravilenskaha traktu ad pałaca dziaciej i moładzi da vuł. V. Słuckaj pavialičać kolkaść pałos, madernizujuć pałatno, palepšać raźviazki i skryžavańni. Poŭnaje zaviaršeńnie rekanstrukcyi płanujecca da kanca 2027-ha.
U hetaj ža častcy rajona idzie pašyreńnie i rekanstrukcyja vuł. Ł. Karastajanavaj z praciaham jaje da MKAD. Adzin učastak užo ŭviali ŭ ekspłuatacyju. Usie raboty płanujecca zakončyć u nastupnym hodzie. Hetyja miery źnimuć transpartnuju nahruzku z kirunku ŭ bok «Paŭnočnaha Bieraha», jaki raźvivajecca.
Praciahvajucca raboty pa ŭźviadzieńni raźviazki pamiž vuł. Cimirazieva i Kaleśnikava. Novaja šaścipałosnaja estakada złučyć Centralny i Frunzienski rajony i stanie adnoj z najbolš praciahłych u Minsku — jaje daŭžynia składzie kala 380 m.
Mietro
Adrazu niekalki stancyj treciaj i čaćviortaj linij padziemki pabudujuć u Centralnym abo ŭ niepasrednaj blizkaści da jaho. Heta stancyi ŭ rajonie skryžavańnia Daŭhinaŭskaha traktu i vuł. Arłoŭskaj, na pr. Mašerava i ŭ Viaśniancy.
A voś u «Paŭnočny Bierah» mietro nie paviaduć: nie dazvalajuć jakaść hruntu i ŭzrovień hruntavych vod. Kab stvaryć dla žycharoŭ ŽK zručnuju transpartnuju łahistyku, budzie zabiaśpiečany padvoz elektratranspartam da novych stancyj mietro.
Kultura i sport
Chutka prymie pieršych naviedvalnikaŭ Nacyjanalny muziej Biełarusi. Vakoł budynka praciahvajecca ŭparadkavańnie parku.
Na stadyi prajektavańnia znachodzicca fizkulturna-azdaraŭlenčy centr dla ekstremalnych vidaŭ sportu na vuł. Naračanskaj. Jon budzie raźličany na kruhłahadovuju pracu. Tut praduhledžanyja zony dla zaniatkaŭ skiejtbardystaŭ, placoŭki dla brejk-dansu i rolikaŭ, batutnyja zały.
Usiaho ŭ rajonie bolš za 100 abjektaŭ roznych kirunkaŭ znachodziacca na stadyi budaŭnictva abo prajektavańnia.
Ciapier čytajuć
«Lipa va ŭsich sensach». Voś jak buduć vyhladać drevy ŭ vazonach na hałoŭnym minskim praśpiekcie. Błohiery atrymali zadańnie imi zachaplacca15
Kamientary