U Sinhapury zapuścili dziaržaŭnuju prahramu, jakaja zaachvočvaje ludziej štodnia čytać knihi. Takim čynam ułady chočuć zmahacca z «dumskrolinham» — zvyčkaj biaskonca i bieskantrolna hartać sacyjalnyja sietki abo stužki navin. Akramia taho, prahrama pavinna dapamahčy palepšyć kancentracyju ŭvahi i raźvivać krytyčnaje myśleńnie, piša The Guardian.
Udzielnik moža rehistravać adzin sieans čytańnia ŭ dzień praciahłaściu nie mienš za 15 chvilin. Za kožny taki sieans jamu naličvajuć 20 virtualnych maniet. Paśla nazapašvańnia 1000 maniet, što adpaviadaje 50 dniam čytańnia, ich možna abmianiać na adzin sinhapurski dalar — prykładna 80 centaŭ ZŠA.
Kiraŭnica Nacyjanalnaj biblijatečnaj rady Mielisa Tam patłumačyła, što ludzi žyvuć u śviecie vielizarnaj kolkaści kantentu, infarmacyi i raznastajnych stymułaŭ. Pavodle jaje słoŭ, zvyčki farmujucca dziakujučy nievialikim, ale rehularnym dziejańniam, tamu arhanizatary pačynajuć z prostaj mety — čytać pa 15 chvilin na dzień.
Urad Sinhapura ŭsio bolš šukaje sposaby źmienšyć niehatyŭny ŭpłyŭ sacyjalnych sietak na moładź. Siarod prapanoŭ — uviadzieńnie štodzionnaha abmiežavańnia času, jaki možna pravodzić u sacyjalnych sietkach. Padstavaj dla hetaha stała niadaŭniaje daśledavańnie, pavodle jakoha najbolšuju škodu maładym ludziam nanosiać mienavita naviaźlivaje prahladańnie niehatyŭnych navin i zaležnaść ad sacyjalnych sietak.
Pry hetym sinhapurskija školniki demanstrujuć vielmi vysokija vyniki ŭ čytańni. Pavodle apošniaha daśledavańnia PISA, 15‑hadovyja vučni Sinhapura zaniali pieršaje miesca ŭ śviecie pa ŭzroŭni čytackaj piśmiennaści, apiaredziŭšy Kitaj i Tajvań.
Finansavyja stymuły dla farmavańnia novych zvyčak u hramadzian dla Sinhapura nie źjaŭlajucca navinkaj. Raniej ułady prapanoŭvali žycharam vaŭčary ŭ supiermarkiety za piešyja prahułki, a taksama ŭznaharody za vykanańnie štodzionnaj normy krokaŭ.
U žniŭni ŭrad Sinhapura taksama ŭvioŭ pakiet finansavaj padtrymki sumaj bolš za 55 tysiač dalaraŭ na kožnaje dzicia va ŭzroście da 17 hadoŭ, a taksama pašyryŭ apłatnyja adpačynki dla baćkoŭ i lhoty na nabyćcio žylla.
Takija maštabnyja miery źviazanyja z demahrafičnym kryzisam u krainie. Sumarny kaeficyjent naradžalnaści ŭ Sinhapury źniziŭsia da histaryčnaha minimumu — 0,87 dziciaci na adnu žančynu. U vyniku kraina nabliziłasia da pierachodu ŭ katehoryju «zvyšstarych» hramadstvaŭ.
Kamientary
Śmiećcie vykidyvaju ŭ śmietnik, ałkahol u publičnych miescaŭ nie ŭžyvaju, na pierachodach čakaju, za prajezd zaŭždy apłačvaju i knižki čytaju.