U sud nakiravali kryminalnuju spravu ŭ dačynieńni da 40‑hadovaha žychara Minska, jakoha abvinavačvajuć u rastracie majomaści ŭ bujnym pamiery, piša ahienctva «Minsk-Naviny».
Mužčyna kiravaŭ ułasnaj stancyjaj techničnaha absłuhoŭvańnia. Da jaho źviarnuŭsia minčuk z prośbaj adramantavać paśla surjoznaj avaryi aŭtamabil Mazda CX-9 2013 hoda vypusku, jaki naležaŭ jahonamu cieściu. U toj čas uładalnik mašyny znachodziŭsia na zarobkach za miažoj i nie moh sam zajmacca ramontam.
Aŭtamabil na evakuatary dastavili na STA, a dyrektar atrymaŭ klučy i dakumienty. Adnak ramont zaciahnuŭsia, bo nieabchodnyja zapčastki byli darahimi i ich było ciažka znajści. U niejki momant uładalnik navat razhladaŭ mahčymaść pradać mašynu biez ramontu, ale paśla pieradumaŭ i pieraaformiŭ jaje na ziacia. Pra heta kiraŭnik STA nie viedaŭ.
Nieŭzabavie byłoj uładalnicy aŭtamabila patelefanavaŭ žychar Bresta i pacikaviŭsia, kali jana płanuje aformić pierachod prava ŭłasnaści na mašynu. Heta vyklikała padazreńni, i siamja vyśvietliła, što dyrektar STA biez dazvołu pradaŭ aŭtamabil za 7 tysiač dalaraŭ, a atrymanyja hrošy vykarystaŭ na asabistyja patreby.
Kupcu jon paviedamiŭ, što dziejničaje z dazvołu ŭładalnicy i što ŭsie dakumienty buduć aformlenyja paźniej. Navat napisaŭ adpaviednuju raśpisku. Ale paśla ździełki kupiec zaŭvažyŭ, što mašyna maje tranzitnyja numary i ŭžo zarehistravanaja na inšaha čałavieka. Jon znajšoŭ kantakty byłoj uładalnicy i źviazaŭsia ź joj.
Paśla vykryćcia dyrektar STA abiacaŭ viarnuć hrošy, ale słova nie strymaŭ. U vyniku paciarpieły źviarnuŭsia ŭ milicyju. Pamier naniesienaj škody acanili ŭ 22 820 rubloŭ.
Abvinavačany całkam pryznaŭ svaju vinu i raskajaŭsia. Aŭtamabil viarnuli zakonnamu ŭładalniku, a kupcu — vypłačanyja za jaho hrošy.
Ciapier mužčynu abvinavačvajuć pavodle častki 3 artykuła 211 Kryminalnaha kodeksa Biełarusi — u rastracie majomaści, jakaja była jamu davierana, u bujnym pamiery. Na čas śledstva ŭ dačynieńni da jaho abrali mieru strymańnia ŭ vyhladzie asabistaha paručalnictva.
«Hałoŭnaje nie zabyvać padzaradžać nie tolki telefon, ale i siabie samoha». Jak ukrainski vajskoviec žyvie z dvuma elektrastymulatarami. I što ŭ jaho z seksam?11
«Hałoŭnaje nie zabyvać padzaradžać nie tolki telefon, ale i siabie samoha». Jak ukrainski vajskoviec žyvie z dvuma elektrastymulatarami. I što ŭ jaho z seksam?1
«Hałandski architektar», jaki adbudavaŭ Vostruju bramu i pastaviŭ sabie dom-krepaść u Hajciuniškach, akazaŭsia nijakim nie hałandcam. Ale jaho spadčyna zachaplaje99
Kamientary