Japonki skardziacca na vałasatyja nohi mužčyn u ofisach. Heta nazyvajuć «charasmientam vałasatymi halonkami»
Ułady Japonii zaklikali supracoŭnikaŭ nasić šorty, kab lahčej pieranosić śpiakotu. Ale mnohija žančyny pryznalisia, što nie ŭ zachapleńni ad adkrytych mužčynskich noh u ofisie.
Z padrabiaznaściami znajomić The Telegraph.
Japonija ŭžo niekalki hadoŭ zapar pieražyvaje ŭsio bolš śpiakotnaje leta. U žniŭni minułaha hoda ŭ krainie była zafiksavanaja rekordnaja tempieratura — 41,8 hradusa. Sioleta Japonskaje mietearałahičnaje ahienctva navat uviało novuju katehoryju — kokushobi, abo «dzień nievynosnaj śpioki», dla vypadkaŭ, kali tempieratura pieravyšaje 40 hradusaŭ.
Za tydzień z 6 pa 12 lipienia ŭ balnicy ź ciepłavymi ŭdarami trapili 4580 čałaviek, jašče siamiora pamierli.
Kab dapamahčy ludziam lahčej pieranosić śpiakotu i adnačasova skaracić spažyvańnie elektraenierhii, ułady praciahvajuć kampaniju Cool Biz, jakaja zaklikaje admaŭlacca ad tradycyjnaha ofisnaha adzieńnia na karyść bolš lohkaha. Mužčynam rekamiendujuć nasić poła i šorty zamiest zvykłych dziełavych kaściumaŭ.
Pavodle japonskich rytejleraŭ, popyt na takoje adzieńnie ŭžo vyras. Adzin z najbujniejšych japonskich vytvorcaŭ adzieńnia — Yofuku no Aoyama — navat vypuściŭ śpiecyjalnuju ofisnuju kalekcyju Cool Biz ź lohkich tkanin, strymanych koleraŭ i kłasičnaha kroju. Jak adznačyli ŭ kampanii, asablivuju ŭvahu nadali daŭžyni šortaŭ, kab jany nie adkryvali zanadta šmat cieła.
Adnak novaja rekamiendacyja vyklikała i niezadavolenaść. U japonskich miedyja navat źjaviŭsia novy termin — sune-hara, abo «charasmient vałasatymi halonkami». Tak nazyvajuć dyskamfort, jaki niekatoryja žančyny adčuvajuć ad vyhladu adkrytych mužčynskich noh u ofisie.
Takija nastroi adlustroŭvajuć i vyniki apytańnia, praviedzienaha sietkaj klinik łaziernaj epilacyi Gorilla Clinic: 53,5% respandentaŭ zajavili, što vystupajuć suprać šortaŭ na pracoŭnym miescy.
«Mužčyny siaredniaha ŭzrostu, kali łaska, nie nadziavajcie šorty. Mnie niajomka. Nie pakazvajcie nohi. Ja nie chaču ich bačyć», — cytuje vydańnie słovy adnoj z udzielnic apytańnia.
Dyskusija zakranuła i pytańnie dvajnych standartaŭ. Choć bolš svabodny dres-kod aficyjna prapanujuć usim supracoŭnikam, mnohija žančyny śćviardžajuć, što ad ich pa-raniejšamu čakajuć, što jany buduć nasić prazrystyja kałhotki abo doŭhija spadnicy navat u śpioku.
Ciapier čytajuć
22‑hadovy Viktar z-pad Klecka pratrymaŭsia na froncie miesiac. A paśla baćki pierasvarylisia, dzielačy hrabavyja14
Kamientary