Ludzi nie mohuć znajści ŭ aptekach preparat «Fierretab komp» — srodak z žalezam i folijevaj kisłatoj, jaki ŭžyvajuć dla lačeńnia i prafiłaktyki žalezadeficytnaj aniemii i schavanaha deficytu žaleza. U Biełarusi jon adpuskajecca biez recepta. Ciapier u Threads biełarusy abmiarkoŭvajuć, dzie znajści leki i čym ich možna zamianić, zaŭvažyła vydańnie Hrodna.life.
«Žalezadeficytčyki, uvaha, pytańnie: a kudy «Fierretab» ź Biełarusi prapaŭ?» — napisała adna z karystalnic.
Miarkujučy pa danych sajta 103.by, ciapier preparatu niama ŭ najaŭnaści ni ŭ adnoj aptecy Biełarusi.
Pry hetym na sajcie Tabletka.by minčanka Natalla jašče 16 červienia pytałasia, kali «Fierretab komp» źjavicca ŭ aptekach stalicy. U adkaz joj paviedamili: «4 kvartał». U Threads pad postam biełaruski chtości ŭdakładniŭ, što preparat časova adsutničaje praź pierarehistracyju.
Adnak, pavodle Dziaržaŭnaha rejestra lekavych srodkaŭ, preparat «Fierretab» maje ŭ Biełarusi biesterminovuju rehistracyju.
Mahčyma, adnoj z pryčyn źniknieńnia lekaŭ mahli stać prablemy ź jakaściu asobnych pastavak. Hod tamu — u žniŭni 2025 hoda — Ministerstva achovy zdaroŭja na padstavie paviedamleńnia «Dziaržfarmnahladu» pryniało rašeńnie kanfiskavać z abaračeńnia dźvie kankretnyja partyi kapsuł «Fierretab komp» aŭstryjskaha vytvorcy G.L. Pharma GmbH — sieryi G06831 i F06988. Respublikanskaja kantrolna-analityčnaja łabaratoryja pryznała ich niajakasnymi praź nieadpaviednaść pakazčykam kolkasnaha vyznačeńnia dvuchvalentnaha žaleza.
Niekatoryja biełarusy sutyknulisia z adsutnaściu i inšych preparataŭ žaleza. Adnaja z karystalnic raskazała, što nie zmahła kupić u Ščučynie «Tardzifieron» i ciapier źbirajecca jechać pa leki ŭ Hrodna:
«Učora nie zmahła kupić «Tardzifieron» u Ščučynie, pryjdziecca jechać za 60 km u Hrodna, tam nibyta jość. Mnie jon vydatna padymaje fierycin i ŭzrovień žyćcia zaadno».
«Tardzifieronu» i praŭda niama ŭ Ščučynie, taksama jak i ŭ Mastach ci Biarozaŭcy. Ale jon jość u prodažy, naprykład, u Astraŭcy, Vaŭkavysku, Śvisłačy, Słonimie, Hrodnie i Lidzie, pavodle danych sajta 103.by.
Inšyja ŭdzielniki abmierkavańnia rajać šukać preparaty praz sajty aptek i praviarać najaŭnaść u roznych haradach. Adna z karystalnic raspaviała, što miesiac tamu znajšła «Fierretab» u Baranavičach, a paźniej zakazała preparat z Rasii.
Na pytańnie, jak zamović leki z Rasii, karystalniki adkazali, što kuplali preparat praz telehram-čaty.
U kamientarach prapanujuć niekalki alternatyŭ «Fierretabu». Siarod ich — užo zhadany «Tardzifieron», «Tatema» i inšyja preparaty žaleza.
Pry hetym karystalniki adznačajuć, što preparaty žaleza pasujuć nie ŭsim adnolkava, tamu samastojna mianiać pryznačany doktaram srodak nie varta.
Ciapier čytajuć
Vyjšaŭ na svabodu vybitny chirurh Andrej Lubiecki11
Vyjšaŭ na svabodu vybitny chirurh Andrej Lubiecki
Unikalnyja zdymki budaŭnictva Staroha mosta ŭ Hrodnie. Chto fatahrafavaŭ niebiaśpiečnyja kiesony, u jakich ludzi ryzykavali na dnie Niomana, kab pastavić apory? ŠMAT FOTA77
Kamientary