Больш за 3 тысячы замежнікаў ужо атрымалі беларускія электронныя візы
З моманту запуску сэрвісу электронных віз у Беларусь ім скарысталіся больш за 3 тысячы замежнікаў. Пра гэта паведамілі ў Нацыянальным цэнтры электронных паслуг.
Замежныя грамадзяне і асобы без грамадзянства могуць уязджаць у Беларусь па электроннай візе. Адпаведная паслуга даступная на партале і ў мабільным дадатку «Е-Паслуга» з 20 сакавіка 2025 года. Атрымаць такую візу могуць грамадзяне 67 краін, у тым ліку ЗША, Канады, дзяржаў Еўрапейскага саюза, Аўстраліі, Новай Зеландыі, Японіі і Вялікабрытаніі.
Каб аформіць электронную візу, неабходна стварыць асабісты кабінет на партале або ў мабільным дадатку. Зарэгістравацца можна з дапамогай электроннай пошты, нумара тэлефона, а таксама акаўнтаў Google або Apple. Пасля гэтага заяўнік запаўняе і адпраўляе візавую анкету.
Заяўка разглядаецца на працягу сямі каляндарных дзён. Пры запаўненні анкеты неабходна пазначаць поўныя і дакладныя звесткі. Памылкі ў асабістых даных могуць стаць прычынай адмовы ў выдачы візы і нават прывесці да забароны на ўезд у Беларусь.
Інфармацыя пра прынятае рашэнне паступае ў асабісты кабінет заяўніка.
Электронная віза з'яўляецца аднаразовай і можа выдавацца на тэрмін да 30 сутак. Яна дазваляе наведаць Беларусь з дзелавымі, турыстычнымі або прыватнымі мэтамі, а таксама для ўдзелу ў спартыўных і навуковых мерапрыемствах.
Пры ўездзе ў Беларусь і падчас знаходжання ў краіне замежнік павінен мець магчымасць прадэманстраваць электронную візу па патрабаванні супрацоўнікаў кантрольных органаў. Яе можна паказаць на экране смартфона альбо падаць раздрукаваную копію.
Цяпер чытаюць
Беларускі кладаўшчык са свастыкай на плячы лячыўся ад алкагалізму ў Сібіры і пайшоў ваяваць за Расію, а застаўся без выплат і працы16
Каментары