У Расіі ўплывовага эканаміста звольнілі за прагноз паражэння РФ у вайне на знясіленне
Дзяржаўная расійская карпарацыя «ВЭБ.РФ» звольніла свайго шматгадовага галоўнага эканаміста Андрэя Клепача пасля яго рэзкага выступу з крытыкай эканамічнага курсу краіны. Паводле даных The Bell, кіраўнік дзяржкарпарацыі Ігар Шувалаў прыняў рашэнне пра звальненне пасля «званка зверху».
Прычынай рэакцыі ўладаў стаў даклад Клепача на сесіі Мікіцкага клуба Маскоўскай біржы, на які пасля публікацыі ў выданні The Moscow Times звярнулі ўвагу шматлікія медыя. У сваім выступе эксперт заявіў, што Расія жыве ілюзіямі і няўхільна адстае ў тэхналагічнай і эканамічнай гонцы.
Закранаючы тэму вайны і санкцыйнага ціску, Кляпач адзначыў, што Расія не зможа перамагчы ў зацяжным канфлікце.
«Мы ў гэтай вайне на знясіленне не выйграем канкурэнцыю. У нас ёсць ілюзія, што там усё рухне. Не рухнула і не рухне. У нас нарастаюць выдаткі», — сказаў эканаміст.
Ён дадаў, што расійская эканоміка прайграе канкурэнцыю не толькі ЗША і Кітаю, але «ў чымсьці прайграе і Украіне».
Паводле ацэнак Клепача, страты ад удараў Узброеных сіл Украіны па расійскай інфраструктуры, нафтагазавых і хімічных комплексах «ужо ператвараюцца ў заўважны макраэканамічны бар'ер росту». Сітуацыю пагаршае і жорсткая палітыка Цэнтрабанка РФ, а таксама пашырэнне амерыканскіх санкцый, праз якія Індыя і Кітай пачалі скарачаць закупкі расійскай нафты.
Найбольш рэзкай часткай дакладу стала папярэджанне пра магчымы сацыяльны крызіс, які эксперт параўнаў з падзеямі Лютаўскай рэвалюцыі 1917 года і распадам СССР у 1991 годзе.
«Я веру, што Расія не разваліцца, але тое, што мы прыйдзем да сацыяльнага крызісу, я амаль упэўнены. Эканамічна мы не рухнем, але і наша адставанне будзе нарастаць з усімі наступствамі, якія з гэтага вынікаюць», — сказаў Кляпач.
Андрэй Кляпач займаў пасаду галоўнага эканаміста «ВЭБ.РФ» на працягу 12 гадоў, а да гэтага быў намеснікам кіраўніка Мінэканамразвіцця РФ. Старэйшая навуковая супрацоўніца Берлінскага цэнтра Карнэгі Аляксандра Пракапенка называе яго адным з найлепшых макраэканамістаў Расіі, адзначаючы, што Кляпач і раней вылучаўся рэалістычнымі ацэнкамі, якія часта выклікалі незадаволенасць кіраўніцтва.
Цяпер чытаюць
«Калі вы пазакрываеце я**льнікі»: злоўлены на допінгу амапавец з Гродна паказаў сваё высокакультурнае аблічча9
Каментары