Крыніцы: Усава і Краўцова выкраслілі польскія службы. З Дзікавіцкім іншая сітуацыя
Высветліліся цікавыя дэталі сітуацыі з незапрашэннем некаторых дзеячаў беларускай эміграцыі на прыём да прэзідэнта Польшчы.
Асобны навагодні прыём для беларусаў — гэта сімвалічнае штогадовае мерапрыемства, традыцыю якога запачаткаваў мінулы прэзідэнт Польшча Анджэй Дуда. Туды збіраліся бізнэсоўцы, прадстаўнікі палітычнай і культурнай эліты. Мінулыя гады пра яго ведала толькі вузкае кола запрошаных — як і пра іншыя падобныя дыпламатычныя раўты.
Публічная крыўда былога дырэктара «Белсата» Аляксея Дзікавіцкага, што яго не запрасілі на сёлетні прыём, прыцягнула да падзеі і спіса гасцей павышаную ўвагу.
«Падрыхтоўкай прыёмаў і мастацкай часткі з беларускага боку традыцыйна займаецца прадстаўніцтва па нацыянальным адраджэнні Аб’яднанага пераходнага кабінета — цяпер гэта Ірэна Кацяловіч і Павел Баркоўскі. Спісы гасцей фармуюцца супольна польскім і беларускім бокам.
Канчатковае рашэнне па спісе ўдзельнікаў застаецца за польскім бокам. Прапановы з беларускага боку далёка не заўсёды прымаюцца», — напісаў у фэйсбуку Франак Вячорка, дарадца Святланы Ціханоўскай, паспрабаваўшы патлумачыць сітуацыю.
Адметна, што прычыны незапрашэння розныя для розных людзей. Пра гэта стала вядома «Нашай Ніве» з трох крыніц.
У цэлым колькасць людзей, запрошаных на прыём, сёлета істотна скарацілі. Гэта звязана, магчыма, з агульным курсам на эканомію. Пры гэтым за мінулы год на свабоду выйшла шмат вядомых палітвязняў. Менавіта ім аддавалі перавагу супрацоўнікі Аб’яднанага пераходнага кабінета, якія складалі «спіс прапановы з беларускага боку». Таму частка гасцей з мінулых прыёмаў у папярэдні спіс не трапіла. Сярод іх і Аляксей Дзікавіцкі, які раней узначальваў тэлеканал «Белсат». Тым не менш, паколькі апошняе слова за польскімі ўладамі, яго ўрэшце дадалі ў лік запрошаных.
Зусім іншы выпадак — з Паўлам Усавым і Іванам Краўцовым. Яны былі ў «беларускім спісе прапановы», але іх скрэслілі польскія службы.
Павел Усаў — палітолаг, які жыве ў Польшчы з сярэдзіны 2000-х. Ён паслядоўна далучаўся да той апазіцыйнай сілы, якая выступала супраць адзінага лідара апазіцыі. Калі лідарам дэмакратычнай апазіцыі быў Мілінкевіч, Усаў далучыўся да «Хартыі», якая Мілінкевіча тапіла. Калі лідарам стала Ціханоўская, Усаў спачатку імкнуўся заахвоціць да канкурэнцыі з ёю Паўла Латушку, а пасля стаў правай рукой Зянона Пазняка.
Іван Краўцоў у 2020‑м быў у штабе Віктара Бабарыкі. Ён быў за рулём машыны, калі на мяжы Марыя Калеснікава выскачыла з машыны і парвала пашпарт. Цяпер Краўцоў — сакратар Каардынацыйнай рады.
«Месячны плацеж пацягне на 340 рублёў». Што будзе ў Беларусі з мабільным інтэрнэтам?15
Каментары
Не трэба выдаваць фантазіі за існасць. Лідары ў нас яшчэ не нарадзіліся, відаць.