Krynicy: Usava i Kraŭcova vykraślili polskija słužby. Ź Dzikavickim inšaja situacyja
Vyśvietlilisia cikavyja detali situacyi z niezaprašeńniem niekatorych dziejačaŭ biełaruskaj emihracyi na pryjom da prezidenta Polščy.
Asobny navahodni pryjom dla biełarusaŭ — heta simvaličnaje štohadovaje mierapryjemstva, tradycyju jakoha zapačatkavaŭ minuły prezident Polšča Andžej Duda. Tudy źbiralisia biznesoŭcy, pradstaŭniki palityčnaj i kulturnaj elity. Minułyja hady pra jaho viedała tolki vuzkaje koła zaprošanych — jak i pra inšyja padobnyja dypłamatyčnyja raŭty.
Publičnaja kryŭda byłoha dyrektara «Biełsata» Alaksieja Dzikavickaha, što jaho nie zaprasili na sioletni pryjom, pryciahnuła da padziei i śpisa haściej pavyšanuju ŭvahu.
«Padrychtoŭkaj pryjomaŭ i mastackaj častki ź biełaruskaha boku tradycyjna zajmajecca pradstaŭnictva pa nacyjanalnym adradžeńni Abjadnanaha pierachodnaha kabinieta — ciapier heta Irena Kaciałovič i Pavieł Barkoŭski. Śpisy haściej farmujucca supolna polskim i biełaruskim bokam.
Kančatkovaje rašeńnie pa śpisie ŭdzielnikaŭ zastajecca za polskim bokam. Prapanovy ź biełaruskaha boku daloka nie zaŭsiody prymajucca», — napisaŭ u fejsbuku Franak Viačorka, daradca Śviatłany Cichanoŭskaj, pasprabavaŭšy patłumačyć situacyju.
Admietna, što pryčyny niezaprašeńnia roznyja dla roznych ludziej. Pra heta stała viadoma «Našaj Nivie» z troch krynic.
U cełym kolkaść ludziej, zaprošanych na pryjom, sioleta istotna skaracili. Heta źviazana, mahčyma, z ahulnym kursam na ekanomiju. Pry hetym za minuły hod na svabodu vyjšła šmat viadomych palitviaźniaŭ. Mienavita im addavali pieravahu supracoŭniki Abjadnanaha pierachodnaha kabinieta, jakija składali «śpis prapanovy ź biełaruskaha boku». Tamu častka haściej ź minułych pryjomaŭ u papiaredni śpis nie trapiła. Siarod ich i Alaksiej Dzikavicki, jaki raniej uznačalvaŭ telekanał «Biełsat». Tym nie mienš, pakolki apošniaje słova za polskimi ŭładami, jaho ŭrešcie dadali ŭ lik zaprošanych.
Zusim inšy vypadak — z Paŭłam Usavym i Ivanam Kraŭcovym. Jany byli ŭ «biełaruskim śpisie prapanovy», ale ich skreślili polskija słužby.
Pavieł Usaŭ — palitołah, jaki žyvie ŭ Polščy ź siaredziny 2000-ch. Jon paśladoŭna dałučaŭsia da toj apazicyjnaj siły, jakaja vystupała suprać adzinaha lidara apazicyi. Kali lidaram demakratyčnaj apazicyi byŭ Milinkievič, Usaŭ dałučyŭsia da «Chartyi», jakaja Milinkieviča tapiła. Kali lidaram stała Cichanoŭskaja, Usaŭ spačatku imknuŭsia zaachvocić da kankurencyi ź joju Paŭła Łatušku, a paśla staŭ pravaj rukoj Zianona Paźniaka.
Ivan Kraŭcoŭ u 2020‑m byŭ u štabie Viktara Babaryki. Jon byŭ za rulom mašyny, kali na miažy Maryja Kaleśnikava vyskačyła z mašyny i parvała pašpart. Ciapier Kraŭcoŭ — sakratar Kaardynacyjnaj rady.
Kamientary
Nie treba vydavać fantazii za isnaść. Lidary ŭ nas jašče nie naradzilisia, vidać.