Прэзідэнт Польшчы ўнёс у сейм праект закона, які радыкальна павялічвае тэрмін атрымання грамадзянства

Прэзідэнт Польшчы Караль Наўроцкі ўнёс у сейм законапраект аб працягненні дапамогі ўкраінцам. Ён прадугледжвае, што сацыяльную падтрымку будуць атрымліваць толькі тыя грамадзяне Украіны, якія афіцыйна працуюць у Польшчы. Але ёсць там і момант, які тычыцца не толькі ўкраінцаў, а наогул усіх замежнікаў.

Наўроцкі прапанаваў унесці папраўку ў адзін пункт закона аб грамадзянстве. Паводле праекта, права на прызнанне грамадзянінам будуць мець замежнікі, якія бесперапынна знаходзяцца на тэрыторыі Польшчы не менш за 10 гадоў на падставе пастаяннага дазволу на жыхарства, дазволу на пражыванне доўгатэрміновага рэзідэнта ЕС альбо права на пастаяннае пражыванне, і якія таксама маюць стабільную і рэгулярную крыніцу даходу, а таксама прававыя падставы для карыстання жылым памяшканнем. У дзеючай рэдакцыі ў гэтым пункце пазначаны тэрмін у 3 гады пастаяннага пражывання на тых жа падставах.

Прапанова Наўроцкага даслоўна супадае з майскім законапраектам, які прапанавалі дэпутаты ад партыі «Права і Справядлівасць». 

«Наша Ніва» расказвала пра праблемы таго кароткага законапраекта. Сама прапанова працягнуць тэрмін знаходжання па пастаянным відзе на жыхарства з 3 гадоў да 10 зыходзіла і зноў зыходзіць з нявернага пасылу, што цяпер 3 гадоў пражывання для грамадзянства дастаткова.

На самай справе, па агульным правіле да пастаяннага віду на жыхарства замежніку трэба пражыць у Польшчы 5 гадоў па часовым. То-бок звычайны шлях да грамадзянства без ільгот па польскім паходжанні, статусе бежанца альбо шлюбе з польскім грамадзянінам, складае мінімум 8 гадоў, а не 3 гады, як сцвярджалі дэпутаты ад «ПіС», і цяпер кажа Караль Наўроцкі. Атрымліваецца, калі законапраект прымуць, стандартны шлях да польскага грамадзянства можа скласці 15 гадоў замест 8, як цяпер.

Прэзідэнцкі праект таксама не прыбірае супярэчнасць, якая ўзнікне, калі яго закон прымуць. Справа ў тым, што па іншым пункце закона на грамадзянства можа падацца замежнік, які 10 гадоў легальна і бесперапынна пражыў у Польшчы і мае пастаянны від на жыхарства альбо карту рэзідэнта Еўрасаюза. 10 гадоў пражывання — гэта, відавочна, менш, чым 15 гадоў, якія спрабуе ўвесці прэзідэнт Польшчы. Але гэтыя два пункты будуць суседнічаць у дакуменце, калі папраўку прымуць.

На гэта, дарэчы, звяртаў увагу і ўрад, калі рэцэнзаваў законапраект «ПіС». Савет міністраў раіў не разглядаць гэты праект.

Пры гэтым Наўроцкі не прапануе ўносіць змены ў астатнія артыкулы закона. Таму людзі з польскімі каранямі, члены сям'і грамадзян Польшчы і бежанцы змогуць атрымліваць грамадзянства хутчэй. 

Прэзідэнцкі законапраект вынесены на грамадскае абмеркаванне. Каментары да праекта RPW/28127/2025 могуць пакідаць і замежнікі, якія жывуць у Польшчы. Трэба запоўніць анкету тут. Для рэгістрацыі ў сістэме сейма патрэбны давераны профіль (profil zaufany).

• 3
• 2
• 0
• 7
• 0
• 2
• 0
• 0