Prezident Polščy ŭnios u siejm prajekt zakona, jaki radykalna pavialičvaje termin atrymańnia hramadzianstva

Prezident Polščy Karal Naŭrocki ŭnios u siejm zakonaprajekt ab praciahnieńni dapamohi ŭkraincam. Jon praduhledžvaje, što sacyjalnuju padtrymku buduć atrymlivać tolki tyja hramadzianie Ukrainy, jakija aficyjna pracujuć u Polščy. Ale jość tam i momant, jaki tyčycca nie tolki ŭkraincaŭ, a naohuł usich zamiežnikaŭ.

Naŭrocki prapanavaŭ unieści papraŭku ŭ adzin punkt zakona ab hramadzianstvie. Pavodle prajekta, prava na pryznańnie hramadzianinam buduć mieć zamiežniki, jakija bieśpierapynna znachodziacca na terytoryi Polščy nie mienš za 10 hadoŭ na padstavie pastajannaha dazvołu na žycharstva, dazvołu na pražyvańnie doŭhaterminovaha rezidenta ES albo prava na pastajannaje pražyvańnie, i jakija taksama majuć stabilnuju i rehularnuju krynicu dachodu, a taksama pravavyja padstavy dla karystańnia žyłym pamiaškańniem. U dziejučaj redakcyi ŭ hetym punkcie paznačany termin u 3 hady pastajannaha pražyvańnia na tych ža padstavach.

Prapanova Naŭrockaha dasłoŭna supadaje z majskim zakonaprajektam, jaki prapanavali deputaty ad partyi «Prava i Spraviadlivaść». 

«Naša Niva» raskazvała pra prablemy taho karotkaha zakonaprajekta. Sama prapanova praciahnuć termin znachodžańnia pa pastajannym vidzie na žycharstva z 3 hadoŭ da 10 zychodziła i znoŭ zychodzić ź niaviernaha pasyłu, što ciapier 3 hadoŭ pražyvańnia dla hramadzianstva dastatkova.

Na samaj spravie, pa ahulnym pravile da pastajannaha vidu na žycharstva zamiežniku treba pražyć u Polščy 5 hadoŭ pa časovym. To-bok zvyčajny šlach da hramadzianstva bieź ilhot pa polskim pachodžańni, statusie biežanca albo šlubie z polskim hramadzianinam, składaje minimum 8 hadoŭ, a nie 3 hady, jak śćviardžali deputaty ad «PiS», i ciapier kaža Karal Naŭrocki. Atrymlivajecca, kali zakonaprajekt prymuć, standartny šlach da polskaha hramadzianstva moža skłaści 15 hadoŭ zamiest 8, jak ciapier.

Prezidencki prajekt taksama nie prybiraje supiarečnaść, jakaja ŭźniknie, kali jaho zakon prymuć. Sprava ŭ tym, što pa inšym punkcie zakona na hramadzianstva moža padacca zamiežnik, jaki 10 hadoŭ lehalna i bieśpierapynna pražyŭ u Polščy i maje pastajanny vid na žycharstva albo kartu rezidenta Jeŭrasajuza. 10 hadoŭ pražyvańnia — heta, vidavočna, mienš, čym 15 hadoŭ, jakija sprabuje ŭvieści prezident Polščy. Ale hetyja dva punkty buduć susiedničać u dakumiencie, kali papraŭku prymuć.

Na heta, darečy, źviartaŭ uvahu i ŭrad, kali recenzavaŭ zakonaprajekt «PiS». Saviet ministraŭ raiŭ nie razhladać hety prajekt.

Pry hetym Naŭrocki nie prapanuje ŭnosić źmieny ŭ astatnija artykuły zakona. Tamu ludzi z polskimi karaniami, členy siamji hramadzian Polščy i biežancy zmohuć atrymlivać hramadzianstva chutčej. 

Prezidencki zakonaprajekt vyniesieny na hramadskaje abmierkavańnie. Kamientary da prajekta RPW/28127/2025 mohuć pakidać i zamiežniki, jakija žyvuć u Polščy. Treba zapoŭnić ankietu tut. Dla rehistracyi ŭ sistemie siejma patrebny davierany profil (profil zaufany).

• 3
• 2
• 1
• 8
• 0
• 2
• 0
• 0