Больш за два месяцы невядома, дзе спікерка Каардынацыйнай рады. Кіраўнік «Байпола» прапанаваў экзатычную версію яе знікнення: Мельнікава паляцела адпачываць на Кубу, там яе затрымалі і перадалі ў Беларусь, піша «Белсат».
Вядома, што Мельнікава планавала адпачынак, інфармавала пра гэта паплечнікаў, пра гэта казаў у тым ліку Латушка. На думку Азарава, яна магла нейкі час пабыць у Лондане з дзецьмі, а потым паляцець з Брытаніі на Кубу — самалёты з Лондану туды лётаюць.
«У 2022 годзе я сустракаўся з Анжалікаю на эканамічным форуме ў Карпачы, і яна расказвала, што ездзіць адпачываць на Кубу, — згадвае Азараў. — Яна тады толькі нядаўна прыляцела, паказвала цыгары адтуль, казала, што ёй вельмі спадабалася, і Куба — вельмі танная краіна, там цудоўны адпачынак. Ездзіла, з ейных словаў, адна».
Калі ёй спадабалася на Кубе і мінулым разам з ёю там нічога не здарылася, а цяпер яна збіралася ў новы адпачынак, то магла зноў паляцець на Кубу, мяркуе Азараў. Кажа, Куба была ягонаю першаю здагадкаю, калі пачуў пра знікненне Мельнікавай. Ён падкрэслівае: гэта не факт, а менавіта здагадка, ды лічыць гэта найбольш імавернаю версіяй.
«Вядома, я быў здзіўлены, як яна наважылася паехаць у краіну, якая сябруе з Лукашэнкам, — адзначае Азараў. — Але ў 2022 годзе яна была проста работніцай офісу Паўла Латушкі, яна не ўзначальвала Каардынацыйнай рады».
Каментары