У Магілёве пяцярых чалавек асудзілі за падпал кіёска ў жніўні 2020 года
12 сакавіка суд Ленінскага раёна Магілёва вынес прысуды пяці жыхарам Магілёўскай вобласці. Іх прызналі вінаватымі ў хуліганстве і псаванні маёмасці, піша Mayday.team.
Паводле паведамлення магілёўскай пракуратуры, абвінавачаныя ўначы ў жніўні 2020 года падпалілі гандлёвы кіёск у адным са спальных раёнаў Магілёва. Кіёск не згарэў і пацярпелі толькі панэлі ягоных сцен.
Паводле інфармацыі Mayday team, падсуднымі на працэсе былі Яўген Пуцянкоў, Ян Рагаўцоў, Юрый Галачкін, Віктар Ічэнскі і Аляксандр Ігнаценка.
Судзілі мужчын па ч. 2 арт. 218 КК РБ («наўмыснае знішчэнне альбо пашкоджанне чужой маёмасці») і ч. 3 арт. 339 КК РБ («хуліганства»). Працэс ішоў з 4 па 12 сакавіка, вяла яго суддзя Святлана Кацапава.
У выніку адзін з абвінавачаных асуджаны да пазбаўлення волі на тэрмін 6 гадоў ва ўмовах строгага рэжыму, другі — на 5 гадоў і 6 месяцаў ва ўмовах узмоцненага рэжыму, а астатнія трое — на 3 гады пазбаўлення волі ва ўмовах узмоцненага рэжыму.
Вядома, што на момант суда двое з абвінавачаных ужо адбывалі пакаранне ў калоніях па раней вынесеных прысудах. Верагодна, гаворка ідзе пра Яўгена Пуцянкова і Яна Рагаўцова. Першы ў 2023 годзе быў асуджаны судом Касцюковіцкага раёна за махлярства, другі ў 2024 быў фігурантам крымінальнай справы аб махлярстве і крадзяжы ў судзе Крычаўскага раёна.
Яшчэ двое чалавек да суда знаходзіліся пад вартай, адзін — пад хатнім арыштам.
Цяпер чытаюць
Беларускі кладаўшчык са свастыкай на плячы лячыўся ад алкагалізму ў Сібіры і пайшоў ваяваць за Расію, а застаўся без выплат і працы15
Каментары