Камароўскі рынак у Мінску ў сярэдзіне лістапада парадаваў пакупнікоў грыбамі. З-за цёплага верасня грыбны сезон быў змазаны, а цяпер, калі дзённая тэмпература паветра апусцілася ніжэй за 10 градусаў, у продажы з'явіліся апенькі, падзялёнкі і іншыя лясныя грыбы, піша Smartpress.by.
Кошт трохлітровага вядзерца маладых апенек — 15 рублёў, пяцілітровага — 25 рублёў, дзесяцілітровага — 40-45 рублёў. Прадаўцы распавядаюць, што самі прыемна здзіўлены хай познім, але ўсё ж сезонам грыбоў.
— Толькі пачаліся — і вось-вось скончацца, зіма ж на носе. Ужо падмярзае ў лесе, — распавядаюць яны. — Так што калі хто плануе прыгатаваць грыбы, замарозіць ці проста паласавацца — цяпер самы час.
Грыбы прадаюцца ў вёдрах на рынку і за яго межамі (з рук, паміж уваходам у метро і Камароўкай). Зноў можна купіць як аб'ёмам (вядром), так і па вазе. 1 кг каштуе 15-20 рублёў.
Акрамя восеньскіх апенек, у продажы можна знайсці лісічкі, махавікі, маслякі. Усе яны прыкладна па адной цане — каля 15 рублёў за 1 кг.
З усесезонных грыбоў, якім мала страшныя капрызы надвор'я, на Камароўскім рынку ў гэтыя дні можна знайсці шэрыя вешанкі і прыгожыя белыя шампіньёны. Каштуюць яны танней — ад 6 да 10 рублёў за 1 кг.
А аматарам экзотыкі можна звярнуць увагу на грыбы эрынгі і энокі — па 35 рублёў за 1 кг. Яны лічацца дыетычнымі і часта ўжываюцца ў стравах азіяцкай кухні.
Цяпер чытаюць
У Тайландзе знікла анліфаншчыца з Пінска. Яе маглі прадаць у М'янму3
Каментары