Праваабаронцы паведамляюць пра масавыя затрыманні з удзелам КДБ у Гродзенскай вобласці
Праваабаронцы пішуць, што 14 лістапада яны атрымліваюць мноства паведамленняў пра затрыманні ў Гродзенскай вобласці. У аблаве ўдзельнічаюць супрацоўнікі КДБ, паведамляе тэлеграм-канал «Суды, затрыманні. Гродна і вобласць».
Колькасць затрыманых, прычыны візітаў сілавікоў, іншыя акалічнасці сённяшніх затрыманняў невядомыя.
Нядаўна праваабаронцы паведамлялі аб масавай «зачыстцы» ў Смаргоні і Слоніме — там затрыманыя каля 50 чалавек, а таксама ў Навагрудку.
Чарговая хваля масавых затрыманняў у Беларусі пачалася 31 кастрычніка і працягваецца да гэтага часу.
Паводле інфармацыі «Нашай Нівы», частка затрыманняў звязана з тым, што 29 кастрычніка КДБ прызнаў «экстрэмісцкім фармаваннем» кааліцыю дваровых чатаў.
Падобна, што ў той жа час ГУБАЗіК «адпрацаваў» некалькі прадпрыемстваў і раёнаў у рэгіёнах. Ён дзейнічаў па ўласным плане, паралельна.
ГУБАЗіК пераважна прыходзіў да людзей, якія траплялі пад увагу сілавікоў раней. Гэта адпавядае логіцы аперацыі па перадвыбарчым застрашванні насельніцтва, пра якую «Наша Ніва» паведамляла раней.
Аблаву 31 кастрычніка — 1 лістапада па маштабе можна параўнаць з арыштамі сваякоў палітвязняў і людзей, якія ім дапамагалі, зімой 2024-га.
Вядома, што ізалятары часовага ўтрымання ў рэгіёнах і Акрэсціна ў Мінску перапоўненыя.
«Нахапалі кучу народу. У двух– і трохмесных камерах — па 15—20 чалавек», — расказвае чалавек, які вызваліўся нядаўна.
Калі вы ведаеце пра тое, што здарылася, больш, пішыце рэдактару «Нашай Нівы» ў ТГ ці на [email protected]. Або любому рэдактару ці журналісту «Нашай Нівы», якога ведаеце асабіста.
Цяпер чытаюць
З праекта будаўніцтва мінскага метро выкінулі яшчэ дзве станцыі — «Кіеўскі сквер» і «Політэхнічную»5
Каментары