У Гродне пабудуюць касцёл з рэдкім для Беларусі нябесным заступнікам
Праект храма, які плануюць пабудаваць у новым гродзенскім мікрараёне Грандзічы, вынеслі на грамадскае абмеркаванне. Яго нябесным патронам мае стаць святы айцец Піа, піша Hrodna.life.
Праект новага касцёла ў Грандзічах — ілюстрацыя з матэрыялаў грамадскіх абмеркаванняў
Паводле праекта, малітоўная зала храма будзе разлічаная на 294 чалавекі. Сцены касцёла абліцуюць чырвона-карычневай керамічнай цэглай. Вышыня вежы касцёла — 30,7 метраў, з крыжом — 34,7 метраў.
У планах, акрамя будынка касцёла, таксама парафіяльны дом, пляцоўка для адпачынку, дзве стаянкі на 12 і 14 машын.
Праект новага касцёла ў Грандзічах — ілюстрацыі з матэрыялаў грамадскіх абмеркаванняў
Двухпавярховы парафіяльны дом (другі паверх — мансардны) атынкуюць і афарбуюць, частку сцен абліцуюць пад цэглу. У доме будзе закрыстыя, канцылярыя, навучальныя класы, жылыя памяшканні, кухня, пральная, пакой для харчавання, санвузлы, міні-кацельня. Парафіяльны дом будзе звязаны з касцёлам пераходнай галерэяй.
Тэрыторыю вакол касцёла азеляняць, паставяць лавачкі.
План размяшчэння храма з матэрыялаў грамадскіх абмеркаванняў
Парафія святога айца Піа (вядомы італьянскі святы XX стагоддзя) з’явілася паводле рашэння гродзенскага каталіцкага біскупа Аляксандра Кашкевіча ў 2019 годзе. Яна ахоплівае мікрараён Грандзічы і найбліжэйшыя вёскі. Кіруе парафіяй ксёндз Артур Малафей.
Святы Піа — рэдкі для Беларусі нябесны заступнік каталіцкіх храмаў. Да гродзенскіх Грандзічаў парафіі яго імя з’яўляліся толькі ў Маладзечне і Лёзне.
Грамадскія абмеркаванні пройдуць з 5 па 19 чэрвеня. Праект можна будзе ўбачыць у гэтыя дні з 8.00 да 13.00 і з 14.00 да 17.00, з панядзелка па пятніцу, у вестыбюлі будынка ўпраўлення будаўніцтва, архітэктуры і горадабудаўніцтва Гродзенскага гарадскога выканаўчага камітэта (плошча Тызенгаўза, 3). Тамсама 12 чэрвеня ў 15.00 у кабінеце № 1 пройдзе прэзентацыя праекта.
Заўвагі і прапановы па праекце прымаюцца з 5 па 19 чэрвеня.
Інфармацыя аб выніках грамадскага абмеркавання павінна з’явіцца да 3 ліпеня на сайце Гродзенскага гарвыканкама.
Цяпер чытаюць
Кіраўніка маркетынгавай кампаніі прысудзілі да 7,5 года за сацыялагічнае даследаванне пра кавід у Беларусі — «здрада дзяржаве»3
Кіраўніка маркетынгавай кампаніі прысудзілі да 7,5 года за сацыялагічнае даследаванне пра кавід у Беларусі — «здрада дзяржаве»
«На канцэртах няма месца радыкальнаму нацыяналізму, агрэсіі і гвалту». Макс Корж выказаўся наконт скандалу, які разгарэўся пасля яго выступу ў Варшаве3434
Каментары