Тры гады таму затрымалі гродзенскага журналіста Дзяніса Івашына

Дзяніса Івашына затрымалі 12 сакавіка 2021 года супрацоўнікі КДБ нібыта за ўмяшанне ў дзейнасць міліцыі і спачатку абвінавацілі паводле арт. 365 Крымінальнага кодэкса. Да позняй ночы ў кватэры журналіста сілавікі праводзілі ператрус. Таксама ў той вечар вобшук зрабілі дома ў маці Дзяніса, а 15 сакавіка прыйшлі з вобшукам да яго 95-гадовай бабулі.

Дзяніс быў рэдактарам-валанцёрам беларускай версіі сайта міжнароднай расследавальнай супольнасці InformNapalm з 2014 года, а таксама пазаштатным карэспандэнтам у газеце «Новы час» з 2018-га, зрабіў некалькі расследаванняў, у тым ліку пра пераход былых украінскіх беркутаўцаў у сілавыя структуры Беларусі.

У сярэдзіне сакавіка 2022 праваабаронцам стала вядома, што КДБ таксама абвінавачвае Івашына ў супрацоўніцтве з украінскай разведкай.

У сярэдзіне чэрвеня 2022 года справу Дзяніса перадалі ў суд. 15 жніўня ў Гродзенскім абласным судзе ў закрытым рэжыме распачаўся разгляд справы журналіста.

14 верасня 2022 года суддзя Валерый Раманоўскі прызнаў Дзяніса Івашына вінаватым паводле арт. 365 (умяшанне ў дзейнасць супрацоўніка ўнутраных спраў) і ч. 1 арт. 356 Крымінальнага кодэкса (здрада дзяржаве) і асудзіў яго да 13 гадоў і 1 месяца калоніі ва ўмовах узмоцненага рэжыму.

Вярхоўны суд 20 снежня 2022 г. разглядзеў апеляцыйную скаргу палітзняволенага журналіста. Прысуд пакінулі без зменаў, а скаргу — без задавальнення.

17 студзеня 2023 года палітвязня этапавалі ў магілёўскую ПК № 15. Ён прыбыў у калонію з высокай тэмпературай і адразу трапіў у шпіталь. 10 лютага стала вядома, што Дзяніса перавялі з бальніцы ў атрад.

Згодна з даведкай з суда, Івашына асудзілі паводле двух артыкулаў Крымінальнага кодэкса: ч. 1 арт. 356 (здрада дзяржаве) і арт. 179 (незаконны збор або распаўсюд дадзеных аб асабістым жыцці). Калі і з якой прычыны адбылася замена ці перакваліфікацыя абвінавачання, невядома.

У канцы лютага 2023 г. Дзяніса перавялі ў турму №1, а ў сакавіку перавялі назад у магілёўскую ПК №15. Там яго абмежавалі дзвюма «атаваркамі» замест належных пяці.

Напрыканцы чэрвеня 2023 года журналіста перавялі на турэмны рэжым у Жодзіна. Жонка палітвязня Вольга адзначала, што пра суд па змене рэжыму ані сваякі, ані адвакат не ведалі. Цяпер ён знаходзіцца ў жодзінскай турме №8 на строгім рэжыме.

Вольга ўчора напісала ў сваім фэйсбуку:

«Набліжаецца трэцяя гадавіна захопу ў палон Дзяніса Івашына. Амаль тыдзень ад яго не прыходзіла новых лістоў. І дагэтуль не адбылося ніводнага з нібы двух абяцаных у сакавіку тэлефанаванняў. Безумоўна, нашыя хваляванні не параўнаюцца з пакутамі сваякоў іншых палітвязьняў, пра якіх месяцамі адсутнічае якая-кольвек інфармацыя. Але наўрад ці мы ад таго станем менш хвалявацца за Дзяніса. Мы ўжо былі сьведкамі таго, як спачатку пра палітзняволенага пераставалі казаць і пісаць, а пазней грамадства раптоўна даведвалася пра іхнае забойства за кратамі ці давядзенне да смерці праз несвоечасовае аказанне меддапамогі».

• 0
• 0
• 0
• 0
• 0
• 3
• 4
• 0