У матчы 25-га тура «Ардабасы» (Шымкент) сёння выйграў у «Шахцёра» з Караганды з лікам 3:1 і за тур да фінішу стаў чэмпіёнам Казахстана па футболе.
У «Ардабасы» за тур да фінішу 58 балаў (18 перамог, 4 нічыі і 3 паразы), ён на шэсць ачкоў апярэджвае «Астану». Розніца мячоў 48-20. Клуб з Шымкента больш за ўсіх забіў мячоў у сёлетнім чэмпіянаце Казахстана і менш за астатніх прапусціў.
Клуб з 2021 года трэніруе беларускі спецыяліст Аляксандр Сяднёў.
У 2021-м і 2022-м гадах шымкенцкая каманда фінішавала пятай у турнірнай табліцы. У 2017-м і 2019-м яна была бронзавым прызёрам.
За «Ардабасы» выступае беларускі форвард Усевалад Садоўскі. За два гады ён правёў за клуб 39 матчаў і забіў восем мячоў.
Гуляе за каманду з Шымкента таксама ўзбекскі форвард Бабір Абдзіхолікаў, які ў 2021-2022 гадах выступаў у першынстве Беларусі за «Энергетык-БДУ», а ў мінулым годзе нават стаў найлепшым бамбардзірам чэмпіянату з 27 мячамі.
Наогул у казахстанскай прэм'ер-лізе выступае найбольшая колькасць беларусаў-легіянераў — 20 футбалістаў. У расійскай прэм'ер-лізе беларусаў роўна ў два разы меней — 10.
50-гадовы Аляксандр Сяднёў трэніраваў у свой час магілёўскі «Савіт», бабруйскую «Белшыну», мінскае «Дынама», магілёўскі «Дняпро». Таксама трэніраваў і казахстанскі «Актабэ», але поспеху вялікага не здабыў. Гэта наогул яго першыя залатыя медалі ў якасці трэнера.
У 2020 годзе Аляксей Шпілеўскі прывёў алмацінскі «Кайрат» да залатых медалёў чэмпіянату Казахстана.
Цяпер чытаюць
Праз дзевяць месяцаў пасля вызвалення памёр палітвязень Валерый Богдан4
Каментары