Аляксандр Класкоўскі. Кропкі над «і»66

Мытная опера

На саміце ў Мінску гучалі фальшыва-патэтычныя ноты. Але не чакайце ідыліі, калі Масква прышчэміць беларускаму партнёру нейкую «адчувальную пазіцыю».

На саміце ў Мінску 27 лістапада тры прэзідэнты спаборнічалі ў аптымістычнай рыторыцы. Гучалі фальшыва-патэтычныя ноты.

Пасля таго як былі падпісаны паперы аб умовах стварэння мытнага звязу Беларусі, Расіі і Казахстана, Аляксандр Лукашэнка заявіў, у прыватнасці, што «без перабольшання, прынятае сёння рашэнне можна назваць лёсавызначальным, як і рашэнне, прынятае ў свой час у Белавежскай пушчы».

Параўнанне, трэба сказаць, рызыкоўнае. Развал Савецкага Саюза ў Віскулях ППРБ не аднойчы клеймаваў як страшнае злачынства. Калі ж пад лёсавызначальным прэцэдэнтам маецца на ўвазе стварэнне СНД, то, як вядома, цяпер пацыент хутчэй мёртвы, чым жывы.

Наколькі аптымістычныя прэзідэнты, настолькі ж скептычныя незалежныя эксперты. Яны адзначаюць: пакуль прыняты толькі голыя дэкларацыі. Галоўныя спрэчкі яшчэ наперадзе.

Не выпадкова гаспадар сустрэчы зрабіў столькі агаворак. З яго слоў, шэраг рашэнняў, якія прымаюцца ў межах мытнага звязу, «вельмі адчувальныя» для Беларусі. Яшчэ больш, гэтыя рашэнні «не ва ўсім нясуць пазітыўны эфект». Але Беларусь, маўляў, пойдзе на падпісанне дакументаў нават ва ўрон сваім інтарэсам з разлікам на светлую будучыню. То бок калі здзейсніцца запаветная мара — запрацуе адзіная эканамічная прастора, гэтыя ахвяры акупяцца з лішкам.

І яшчэ агаворка: «Горай за ўсё будзе, калі акажацца, што нацыянальныя, дробязныя, аднахвілінныя інтарэсы будуць пераважаць над агульнымі інтарэсамі».

А хто, уласна кажучы, дасць зуб, што гэты горшы сцэнарый не рэалізуецца? Дасюль, паклаўшы руку на сэрца, толькі так і адбывалася. Таму і ляснулася (ці ледзьве дыхае) цэлая чарада постсавецкіх інтэграцыйных структур (дарэчы, і АЭП ужо спрабавалі, але Украіну гэтым пернікам так і не прывабілі).

Д’ябал, як вядома, тоіцца ў дэталях. Між тым шэраг балючых (іх далікатна называюць «адчувальнымі») пытанняў прэзідэнты, якія зляцеліся ў Мінск, проста адсунулі, каб не псаваць абедню, на потым. Напрыклад, паводле віцэ-прэм’ера Андрэя Кабякова, краіны мытнай тройкі «да 1 ліпеня 2010 года працягнуць перамовы аб мытах на аўтамабілі і нафту».

Карацей, справа ясная, што справа цёмная.

А для беларускага ж боку прынцыпова важна, ці саступіць Расія ў цане на газ, ці скасуе мыта на нафту, ці паставіцца па-боску да мытнага тарыфу на іншамаркі (перспектыва іх рэзкага падаражання паставіла ўжо на вушы далёкага ад макраэканомікі айчыннага абываталя). Калі без эківокаў, то

менавіта дзеля танных (ну хаця б адносна танных!) энергарэсурсаў Мінск і ўлез у гэты праект, што ініцыяваны Масквой і, як акуратна падлічыў Лукашэнка, удвая ўзмацняе пазіцыі Расіі.

Эканамічны аглядальнік Таццяна Манёнак, з якой мы абмяркоўвалі па гарачых слядах мінскі саміт, прадказвае вязкі торг, калі кожная з краін тройкі будзе выбіваць для сябе выгаднейшыя ўмовы. Яна нагадвае: з 1995 года Расія і Беларусь спрабавалі стварыць мытны хаўрус у межах «саюзнага будаўніцтва», але так і не дабілі пытанне. Праз тыя ж «адчувальныя пазіцыі». І хто сказаў, што ўтраіх дамовіцца будзе лягчэй, чым удвух? Тым болей што пратэкцыянісцкія замашкі партнёраў нікуды не падзеліся.

Паводле эксперта,

«у падкорцы у чыноўнікаў, падобна, сядзіць надзея, што ў мытным звязе пашэнціць штосьці вытаргаваць, закансерваваць эканамічную сітуацыю, схавацца ад рэформаў». Але такая кансервацыя толькі запаволіць вельмі патрэбны нам працэс эканамічнай мадэрнізацыі.

«Гэты саюз можа стаць пятым колам ў возе, — гаворыць Таццяна Манёнак. — Больш лагічна было б не адгароджвацца, а адразу набліжацца да правілаў Сусветнай гандлёвай арганізацыі, умоў Еўразвязу».

Магчыма, менавіта гэта меў на ўвазе і Лукашэнка, калі зрабіў рэмарку, што «мытны звяз не стварае якіх-небудзь прынцыповых перашкод для ўдзелу нашых дзяржаў у іншых міжнародных эканамічных ініцыятывах». Памятаеце, улетку, адказваючы на пытанне аўстрыйскага журналіста, што для Мінска больш прыярытэтнае — гэты мытны звяз ці зона свабоднага гандлю з ЕЗ, беларускі кіраўнік прадэманстраваў найвышэйшы пілатаж прагматызму: «Для нас прыярытэт у тым, што раней мы можам рэалізаваць».

Іншае пытанне, што

для эканамічнай стыкоўкі з Еўразвязам варта найперш уступіць у СГА і ўвогуле правярнуць да халеры ўсялякіх рэформаў. І яшчэ пытанне: а ці далёка адпусціць Масква? Для яе ж гэты мытны звяз — не столькі нават эканамічны, колькі палітычны праект: прывязаць!

А вось на «Усходняе партнёрства» — патэнцыйныя вароты Беларусі ў Еўропу — Крэмль, хоць і стараецца зрабіць добрую міну, вой як касавурыцца!

Між іншым, Мядзведзеў у Мінску падкрэсліў: упершыню за апошнія гады бакі дамовіліся пра «перадачу часткі нацыянальнага суверэнітэту наднацыянальнаму органу — камісіі мытнага звязу, якая будзе прымаць рашэнні аб мытных тарыфах».

Лукашэнка, як мы памятаем, адкідаў усе тыя праекты канстытуцыйнага акта саюзнай дзяржавы, у якія Масква закладала сваё дамінаванне. З гэтай жа прычыны была тарпедавана ідэя адзінай валюты: каб у Крэмль па заробак ездзіў — не дачакаецеся!

У згаданай жа камісіі Расія мае 57% галасоў. Калі яна дамовіцца з Казахстанам у нейкім пытанні — Мінск аўтаматам у аўце. І што, вы чакаеце ідыліі, калі Масква, карыстаючыся перавагай, прышчэміць беларускаму партнёру нейкую «адчувальную пазіцыю»?

Карацей, самыя інтрыгоўныя моманты мыльнай інтэграцыйнай оперы «Мытны звяз» яшчэ наперадзе. І калі хтосьці ў Маскве ўжо п’е шампанскае за ўдачу новага праекта, то не выключаны пахмельны сіндром.

Іншая рэч, што і для Беларусі гэта эпапея можа толькі падоўжыць эпоху вырваных гадоў.

Каментары6

Цяпер чытаюць

Чамаданава расказала, што катэгарычна нельга абмяркоўваць на кухнях12

Чамаданава расказала, што катэгарычна нельга абмяркоўваць на кухнях

Усе навіны →
Усе навіны

З-за навальніцы на поўначы Мінска на 25 секунд адключалася электрычнасць

Сям’я беларусаў аказалася ў двух розных асяродках эміграцыі. Муж не можа трапіць да жонкі ў Грузію, а яна — атрымаць візу да яго ў Польшчу10

Алімпійская чэмпіёнка па біятлоне прапала ў гарах Пакістана1

Магутны землятрус каля берагоў Камчаткі прывёў да цунамі, у Японіі і на Гаваях абвешчана эвакуацыя

Якія машыны беларусы дагэтуль актыўна вязуць з ЗША7

Беларус распрацаваў перакладчык для бізнэсу, які прыносіць яму мільён даляраў на год14

У заапарку Нюрнберга застрэлілі 12 бабуінаў. Для іх не хапала месца6

Мінск проці ночы зноў паплыў ВІДЭА3

Сэрвіс, які дазваляе дзяўчатам абменьвацца звесткамі пра мужчын, стаў самым папулярным у ЗША. Але нешта пайшло не так23

больш чытаных навін
больш лайканых навін

Чамаданава расказала, што катэгарычна нельга абмяркоўваць на кухнях12

Чамаданава расказала, што катэгарычна нельга абмяркоўваць на кухнях

Галоўнае
Усе навіны →

Заўвага:

 

 

 

 

Закрыць Паведаміць