Амерыканская кампанія Transcend дае плацежаздольным кліентам магчымасць стаць дрэвамі, прычым кліент сам можа выбраць від дрэва.
Дарэчы, такая ж паслуга прапануецца і для катоў з сабакамі: наборы для пахавання хатніх жывёл прадаюцца асобна, праўда з абмежаваннем вагі ў 40 кг.
Кампанія заснаваная Мэцью Кохманам, прадпрымальнікам, эколагам і трансцэндэнталістам. Трансцэндэнталізм развіўся ў канцы 1820-х і 1830-х гадах у Новай Англіі ў ЗША. Гэта філасофская плынь, асноўнымі элементамі якой з’яўляюцца індывідуалізм і вера ў сілу асобы (звязаная найперш з асабістай свабодай), індыйскія Веды і філасофія, ідэалізм і выключная важнасць прыроды (паважлівае стаўленне і захаванне яе).
Кампанія Transcend абяцае, што калі вы памраце, то (за неназваную плату) будзеце пахаваныя ў ложку з драўнянай шчэпкі або сена, у дзвюх гадзінах за межамі асноўнага мегаполіса па вашым выбары і прыкладна ў метры пад пластом глебы, узбагачанай мікарызай (гэта сімбіёз грыбнога міцэлію з каранямі вышэйшых раслін). Такім чынам ваша цела, якое раскладаецца, будзе карміць грыбы і забяспечваць пажыўнымі рэчывамі карані маладога дрэва, якое вы самі зможаце абраць (на гэты момант ёсць 10 відаў на выбар), пераплятаючыся таксама з сеткамі міцэлію і каранямі іншых дрэў, якія будуць расці вакол вас.
Так вы станеце адным цэлым з дрэвам і ўсім навакольным асяроддзем, а зямля, у якой вы пахаваныя, будзе навечна абароненая ад далейшага развіцця, абяцае кампанія. Верагодна, гэта неблагі шанец (перад тым, як стаць дрэвам і пазнаёміцца з мікарызай бліжэй) проста змяніць сваё ўспрыманне смерці і пры гэтым дапамагчы выратаваць планету.
Transcend таксама абяцае пасадзіць 1000 дрэў ад вашага імя, калі вы памраце, дзякуючы партнёрству з One Tree Planted (генеральны дырэктар Мэт Хіл з'яўляецца адным з дарадцаў Transcend).
У каментарыі для Inverse Кохман кажа, што яго амбіцыі адносна Transcend яшчэ больш сур’ёзныя: ён сканцэнтраваны на прыцягненні людзей у такі бізнес, які не проста пахавае іх праз 70 гадоў, але і «збудуе з імі адносіны на ўсё астатняе жыццё, дапамагаючы ім годна старэць як спажыўцам з экалагічным мысленнем».
Па даных New Hampshire Funeral Resources and Education, у ЗША цяпер налічваецца 351 зялёны цвінтар. Дваццаць з іх з'яўляюцца прыродаахоўнымі могілкамі, што азначае, што яны (як і Transcend) маюць падвойную місію: забяспечваць натуральныя пахаванні і абараніць зямлю ад забудовы.
На вэб-сайце Transcend не паведамляецца, колькі першапачаткова будуць каштаваць браніраванні гаёў, якія стануць даступнымі пазней у гэтым годзе. У той жа час, паведамляецца, што «адзіная плата Tree Burial складае 1/2 цаны традыцыйнага пахавання», аднак у сакавіку 2023 года Transcend распрадала свае пакеты прэміум-класу Future Tree па 8500$ (яны абяцаюць пакупнікам «доступ да фінансавых і прэферэнцыйных пераваг» шляхам фіксацыі індывідуальнай цаны, а таксама 100 дрэваў, пасаджаных «неадкладна» на «тэрыторыях з вялікай патрэбай»).
Праблема трыльёна дрэў
Нягледзячы на тое, што многія зялёныя могілкі сапраўды прапануюць пасадзіць дрэва непасрэдна на магіле, не ўсе ў галіне згодныя з экалагічнасцю гэтай практыкі. Маладым дрэвам, якія растуць, патрэбна дастаткова прасторы (у ідэале, не менш за 4,5 м²).
А што з дадатковай тысячай дрэў, якія Transcend плануе высаджваць за кожную замову? Вэб-сайт кампаніі неаднаразова адзначае патэнцыял кампаніі ў дасягненні жаданай лічбы ў 1 трыльён дрэў — гэтая лічба была ўпершыню прапанаваная ў даследаванні 2019 года як тое, што можа дапамагчы аднаўленню глабальнага ляснога покрыва на планеце і стаць вырашальным у барацьбе са змяненнем клімату.
Але многія эксперты па клімаце і лясной гаспадарцы не згодныя са сцвярджэннем, што пасадка 1 трыльёна дрэў з'яўляецца годным рашэннем у змаганні з кліматычным крызісам. Даследчыкі кажуць, што найбольш эканамічна эфектыўным кліматычным рашэннем з’яўляецца не высадка новых дрэваў, а захаванне ўжо існуючых цэлых экасістэм, а таксама прадухіленне іх разбурэння. Даследчыкі кажуць, што насаджэнне дрэў на лугах, хмызняках і тарфяніках можа знішчаць біяразнастайнасць, а лясы могуць аднаўляцца на высечаных землях натуральным шляхам, калі толькі чалавек не будзе гэтаму перашкаджаць.
Як і ў выпадку з пасадкай аднаго дрэва над адной магілай, пытанні масавай пасадкі дрэў шмат у чым залежаць ад выканання. Арганізацыі, якія распрацоўваюць праекты, зачастую заснаваныя на недасведчанай палітыцы, не высаджваюць адпаведную расліннасць, саджаюць дрэвы толькі для таго, каб зноў іх высекчы для карпаратыўнага выкарыстання, і наўмысна засяроджваюцца на пасадцы дрэў у шкоду іншым намаганням па скарачэнні выкідаў вуглякіслага газу.
Таму стаць дрэвам пасля смерці — цудоўная ідэя, якая, аднак, павінна рэалізоўвацца найперш на аснове навуковых даных, а не сыходзячы з тэндэнцый і законаў рынку.
І ўсё ж незалежна ад таго, ці метады Transcend сапраўды экалагічна чыстыя, факт, што традыцыйныя пахаванні ў многіх культурах штогод прыводзяць да выкіду ў навакольнае асяроддзе агромністых колькасцей металу, бетону, вадкасці для бальзамавання і іншых рэчываў. Таму кожны мае сам абіраць, які след ён захоча пакінуць пасля сябе на планеце.
Цяпер чытаюць
Заканчваецца тэрмін даўніны па народным пратэсным артыкуле. Больш нікога не пасадзяць? Не, ёсць нюансы11
Каментары