Чаму ў Беларусі забаранілі антыўтопію «1984»? Вы не паверыце ў самую імаверную версію
Забарона на продаж «1984» адбылася адразу пасля пагрому кнігарні «Кнігаўка», дзе прадаваўся беларускі пераклад гэтай кнігі, і затрымання Насты Карнацкай, супрацоўніцы «Кнігаўкі», якая калекцыянавала гэты твор на розных мовах.
На фота вышэй — кнігі Оруэла з прыватнай бібліятэкі Насты Карнацкай.
Знаёмыя Карнацкай адзначаюць, што яна была фанаткай творчасці Оруэла і калекцыявала раман «1984» на розных мовах.
Суразмоўцы «Нашай Нівы» выказваюць здагадку, што ГУБАЗіК пры вобшуку адкрыў для сябе асартымент «Кнігаўкі», новую для сябе літаратуру, што і выклікала рашэнне аб забароне. Вядома, што ГУБАЗіК актыўна дыктуе, якія выданні і рэсурсы «дэструктыўныя». З нядаўняга часу дастаткова рашэння аднаго Міністэрства ўнутраных спраў, каб прызнаць любы кантэнт забароненым ці непажаданым.
Распараджэнне ў кнігарні пайшло 18 мая, праз два дні пасля ператрусу ў «Кнігаўцы».
Кнігу знялі з продажу ў дзяржаўных кнігарнях, у прыватных сетках яна пакуль застаецца ў асартыменце. Мяркуючы па гэтым, распараджэнне пайшло па каналах «Белкнігі», якая падпарадкоўваецца Міністэрству інфармацыі, а яно, у сваю чаргу, выконвае загады з Адміністрацыі прэзідэнта.
У разнарадцы на забарону фігуравалі словы аб «усіх выданнях» гэтай кнігі. Мелася на ўвазе — як беларускамоўны, так расейскамоўны пераклады.
Нагадаем, 16 мая у новаадкрытую выдавецтвам «Янушкевіч» прыватную кнігарню «Кнігаўка» прыйшла палітычная паліцыя.
Гэтаму папярэднічала стварэнне заказных рэпартажаў з фальсіфікаванымі фактамі ў ТГ-каналах Азаронка і Гладкай, якія выкарыстоўваюцца спецслужбамі для апраўдання пагромаў.
Пасля вобшуку супрацоўнікаў «Кнігаўкі» арыштавалі — яны адбываюць адміністрацыйны арышт. Сотні адзінак літаратуры вынятыя.
Звязаныя з органамі тэлеграм-каналы вінавацяць супрацоўнікаў у вядзенні літаратурных каналаў і перапісцы з дзеячамі дэмакратычных сілаў. Цяпер Наста Карнацкая адбывае адміністратыўны арышт за «дробнае хуліганства» — тыповы артыкул для сфальсіфікаваных палітычных спраў. Артыкул выдаўца Андрэя Янушкевіча невядомы, але ён таксама атрымаў адміністратыўны арышт.
Зняццё з продажу класічнай антытаталітарнай утопіі, якая была забароненая і ў СССР, не прайшло ціха, выклікала вялікі розгалас у грамадстве. Пабачым, ці пасля гэтага Оруэл вернецца на паліцы «Светача» і «Акадэмкнігі».
Чытайце таксама:
Лукашысты абрынуліся на кнігарню за тое, што яна прадае кнігі на беларускай мове
Выдаўцу Андрэю Янушкевічу далі 10 сутак
Цяпер чытаюць
Беларускі кладаўшчык са свастыкай на плячы лячыўся ад алкагалізму ў Сібіры і пайшоў ваяваць за Расію, а застаўся без выплат і працы10
Каментары