Сотні тысяч дэманстрантаў другую нядзелю запар занялі ўвесь цэнтр Мінска ФОТЫ
Дакладную колькасць дэманстрантаў падлічыць немагчыма, але, здаецца, іх было нават больш, чым тыдзень таму.
Вось кароткае відэа:
Пакуль адна бясконцая калона ішла да Стэлы, другая пайшла на плошчу Якуба Коласа і г.д.
Частка дэманстрантаў ад Стэлы, некалькі дзясяткаў тысяч, пасля рушыла да плошчы Дзяржаўнага Сцяга, што за Палацам Незалежнасці. Але праспект Пераможцаў там загарадзіў АМАП, і людзі развярнуліся разыходзіцца.
У гэты момант Аляксандр Лукашэнка з аўтаматам пад прыцэламі тэлекамер сеў у верталёт, абляцеў ужо пусцеючы праспект і вярнуўся
АМАП сустрэў яго на сваёй барыкадзе апладысментамі. Але гэтая іх сцэна дысаніравала з атмасферай на вуліцах — абсалютна мірнай і неагрэсіўнай.
На вуліцы Мінска выйшла вельмі розная публіка: там быў і сярэдні клас, і рабочыя, і госці з рэгіёнаў.
Панавала атмасфера карнавалу і ўздыму.
Мінчукі віталі шэсце сцягамі з балконаў і дахаў.
Жанглёр цырка дэманстраваў сваё майстэрства пад апладысменты.
Былі барабаны, людзі ў крэатыўных касцюмах і тысячы плакатаў, а таксама шыльды з назвамі сваіх прадпрыемстваў і населеных пунктаў.
А калі ўлады з мэтай псіхалагічнага ўздзеяння ўключылі гучнамоўнікі з савецкімі песнямі, народ жыва падпяваў «Первым делом самолеты»: «Первым делом, первым делом Лукашенко, а Ермошина, Ермошина потом».
Улады выставілі шчыльны кардон перад Стэлай з аўтаматамі ў якасці дэманстрацыі сілы.
Байцы збянтэжана назіралі за сотнямі тысяч людзей, што ішлі, і ішлі, і ішлі побач, са сцягамі і кветкамі.
Жыхары жылога дома насупраць Стэлы вывесілі два гіганцкія нацыянальныя сцягі.
Да моманту напісання гэтага матэрыялу не было вядома ні пра адзін інцыдэнт, дэманстранты паводзілі сябе выключна мірна.
У мінскім гандлёвым цэнтры Palazzo сабралася даўжэзная чарга. Па дармовых мядзведзікаў!5
Каментары