На Львоўскім форуме выдаўцоў скандал: нацыяналісты супраць дзіцячай кніжкі «пра аднаполае каханне»
У сувязі з пагрозамі нацыяналістаў Міністэрства культуры Украіны заклікае праваахоўнікаў і СМІ абараніць удзельнікаў форуму, які стартаваў у Львове 13 верасня.
Гаворка ідзе пра выданне «Мая і яе мамы» аўтарства Ларысы Дзенісенка і Марыі Фоя, якое адрасавана дзеткам і іх бацькам.
Галоўная гераіня кніжкі — дзяўчынка Мая знаёміць чытачоў са сваімі сябрамі, сваякамі і асяроддзем.
З дапамогай малюнкаў, простымі словамі яна тлумачыць такія складаныя тэмы, як бясплоддзе, донарства спермы, сіроцтва, развод, смерць і вайна ва Украіне, хто такія крымскія татары… Так, Майка, напрыклад, распавядае пра адну са сваіх аднакласніц Сафійку: «Софійка Третя не вчилася з нами від першого класу. Вона новенька! Вони з мамою приїхали з Луганська. Тато Софійки Третьої зник. Люди часто зникають, коли йде війна». Дадаткова дробным шрыфтам у кніжцы ўдакладняецца, хто такія перасяленцы і колькі іх сёння ў краіне. Ёсць там гісторыя і пра дзяўчынку-беларуску Аксану.
Але тых, хто азнаёміўся са зместам кніжкі, больш за ўсё абурыў яе фінал, дзе Мая прызнаецца ў тым, што яе гадуюць дзве маці, і прыходзіць да высновы, што няважна, якая ў цябе сям'я, галоўнае — каб там панавалі любоў і павага.
«Правы сектар», а таксама прадстаўнікі некалькіх нацыяналістычных грамадскіх арганізацый Львова запатрабавалі адмяніць прэзентацыю кніжкі, бо яе змест супярэчыць «каштоўнасцям і традыцыям, якія спакон веку фармаваліся ва ўкраінскіх сем'ях». Калі гэта не будзе зроблена, яны абяцалі прыняць адпаведныя меры самастойна.
Нягледзячы на тое, што арганізатары адмянілі прэзентацыю кніжкі, якая павінна была адбыцца 15 верасня, яны не выключаюць, што радыкалы ўсё роўна могуць зладзіць у межах форуму небяспечную акцыю, правакацыі ці скандал.
Раней «Мая і яе мамы» на прэзентацыі у Харкаве трапіла пад жорсткую крытыку мясцовых маці, якія не разумеюць, навошта аўтары прапагандуюць «нездаровыя» сем’і. Сама пісьменніца Ларыса Дзенісенка называе сваю кніжку дапаможнікам па ўзаемапавазе і талерантнасці.
Цяпер чытаюць
26‑гадовага супрацоўніка элітнага падраздзялення мытні асудзілі на 16 гадоў па наборы палітартыкулаў. Сярод іх і «здрада дзяржаве»9
Каментары