Na Lvoŭskim forumie vydaŭcoŭ skandał: nacyjanalisty suprać dziciačaj knižki «pra adnapołaje kachańnie»
U suviazi z pahrozami nacyjanalistaŭ Ministerstva kultury Ukrainy zaklikaje pravaachoŭnikaŭ i ŚMI abaranić udzielnikaŭ forumu, jaki startavaŭ u Lvovie 13 vieraśnia.
Havorka idzie pra vydańnie «Maja i jaje mamy» aŭtarstva Łarysy Dzienisienka i Maryi Foja, jakoje adrasavana dzietkam i ich baćkam.
Hałoŭnaja hierainia knižki — dziaŭčynka Maja znajomić čytačoŭ sa svaimi siabrami, svajakami i asiarodździem.
Z dapamohaj malunkaŭ, prostymi słovami jana tłumačyć takija składanyja temy, jak biaspłodździe, donarstva śpiermy, siroctva, razvod, śmierć i vajna va Ukrainie, chto takija krymskija tatary… Tak, Majka, naprykład, raspaviadaje pra adnu sa svaich adnakłaśnic Safijku: «Sofijka Trietia nie včiłasia z nami vid pieršoho kłasu. Vona novieńka! Voni z mamoju prijichali z Łuhanśka. Tato Sofijki Trieťoji źnik. Ludi často źnikajuť, koli jdie vijna». Dadatkova drobnym šryftam u knižcy ŭdakładniajecca, chto takija pierasialency i kolki ich siońnia ŭ krainie. Jość tam historyja i pra dziaŭčynku-biełarusku Aksanu.
Ale tych, chto aznajomiŭsia sa źmiestam knižki, bolš za ŭsio aburyŭ jaje finał, dzie Maja pryznajecca ŭ tym, što jaje hadujuć dźvie maci, i prychodzić da vysnovy, što niavažna, jakaja ŭ ciabie siamja, hałoŭnaje — kab tam panavali luboŭ i pavaha.
«Pravy siektar», a taksama pradstaŭniki niekalkich nacyjanalistyčnych hramadskich arhanizacyj Lvova zapatrabavali admianić prezientacyju knižki, bo jaje źmiest supiarečyć «kaštoŭnaściam i tradycyjam, jakija spakon vieku farmavalisia va ŭkrainskich siemjach». Kali heta nie budzie zroblena, jany abiacali pryniać adpaviednyja miery samastojna.
Niahledziačy na toje, što arhanizatary admianili prezientacyju knižki, jakaja pavinna była adbycca 15 vieraśnia, jany nie vyklučajuć, što radykały ŭsio roŭna mohuć zładzić u miežach forumu niebiaśpiečnuju akcyju, pravakacyi ci skandał.
Raniej «Maja i jaje mamy» na prezientacyi u Charkavie trapiła pad žorstkuju krytyku miascovych maci, jakija nie razumiejuć, navošta aŭtary prapahandujuć «niezdarovyja» siemji. Sama piśmieńnica Łarysa Dzienisienka nazyvaje svaju knižku dapamožnikam pa ŭzajemapavazie i talerantnaści.
-
«Ci jość sens za ich čaplacca?» Pucin namiaknuŭ pra hatoŭnaść spynić vajnu, kali jamu zdaduć Danbas
-
Iłan Mask viartajecca ŭ administracyju Trampa, užo ŭ novaj roli
-
U Efiopii paśla niekalkich hadoŭ pierapynku znoŭ razharajecca poŭnamaštabnaja hramadzianskaja vajna. Moža destabilizavacca i ŭvieś rehijon
Toj samy masažyst raskazaŭ, navošta zdymaŭ hołych klijentak2
Kamientary