Viadomaje muzyčnaje šou «SamŠazam» zakryłasia ŭ Biełarusi. Mikita Najdzionaŭ raskazaŭ, čamu pierazapuskaje jaho ŭ Varšavie

«SamŠazam» — heta muzyčnaje šou z bendam i viadoŭcami, dzie hości adhadvajuć pieśni ŭ žyvym vykanańni. Za siem hadoŭ pracy ŭ Biełarusi adbyłosia bolš za 500 mierapryjemstvaŭ.

A pačynaŭsia «SamŠazam» u Minsku ŭ 2018 hodzie sa storys muzyki Mikity Najdzionava.

— U toj momant ja byŭ biez hurta ci inšaha muzyčnaha prajekta. Jak kažuć, just for fun, uziaŭ ukulele, pačaŭ hrać na im niejkija viadomyja pieśni i prapanoŭvaŭ padpisčykam uhadać kampazicyju. Niečakana navat dla mianie ludziam heta vielmi spadabałasia, jany aktyŭna adhukalisia.

Pavialičyć

Praź niekalki miesiacaŭ Mikita vyrašyŭ zrabić pieršuju afłajn-imprezu. Na hulniu sabrali dzieviać kamand (kala 50 čałaviek). Muzyčny kviz potym pieraros u sapraŭdnaje šou.

Paśla pieršaha vystupu «SamŠazam» paklikali vystupić na muzyčnym fiestyvali i źjavilisia zamovy na karparatyvy.

— My źmianili i farmat karparatyvaŭ — raniej na ich ludzi jeli dy słuchali kavier-bendy. My ž pakazali, što možna bavić čas značna cikaviej. Dziakujučy hetamu «SamŠazam» adnosna lohka pieražyŭ kavidny 2020 hod. My chutka prydumali anłajn-farmat hulni. I pakul inšyja muzyki siadzieli biez pracy, my rehularna rabili strymy dy narmalna na ich zarablali.

Pavialičyć

Ale 22 sakavika 2023 hoda Mikitu zatrymali pavodle palityčnaha «narodnaha» artykułu 342 KK — za ŭdzieł u pratestach.

— Jak ciapier pamiataju, u mianie było šmat płanaŭ na hety dzień. Ja pavinien byŭ pravodzić sumoŭje, potym pajechać zapisvać novuju pieśniu… Mnie było składana ŭjavić, chto zmoža zamianić mianie jak viadoŭcu na «SamŠazamie». Dyj nie tolki jak viadoŭcu, ja ž zajmaŭsia pradziusavańniem šou, prahramaj… Ale ŭ takoj składanaj situacyi kamanda apieratyŭna zaryjentavałasia i zdoleła praciahnuć pracu bieź mianie.

Kamanda «SamŠazama» starałasia nie afišavać toje, što Mikita trapiŭ u biadu. Ale infarmacyja ŭsio ž źjaviłasia ŭ publičnaj prastory. Aŭdytoryja prajekta z parazumieńniem staviłasia da ŭsiaho hetaha.

— Ja nie mahu skazać, što navina pra majo zatrymańnie niejak paškodziła ci naadvarot niejak dapamahła. Ale mnie zdavałasia, što heta ŭsio ž intymnaja sprava i lepiej by ŭsie dumali, što ja ŭ niejkim tvorčym adpačynku.

Pavialičyć

Čatyry miesiacy Mikita pravieŭ za kratami — u vyniku atrymaŭ 3 hady chatniaj chimii. Apynuŭšysia na svabodzie, amal adrazu viarnuŭsia da pracy.

— My zrabili majo viartańnie prosta šykoŭnym. Zapisali biełaruskamoŭny kavier na pieśniu Mr. Brightside hurta The Killers. Darečy, mienavita nad im ja pracavaŭ u noč pierad svaim zatrymańniem.

Pačynajecca heta pieśnia słovami: Coming out of my cage, and I've been doing just fine («Vychodžu z kletki, i ŭ mianie ŭsio dobra»), — atrymałasia davoli simvalična.

View this post on Instagram

A post shared by SamŠazam (@samshzm)

— Tady ja ŭpieršyniu pryjšoŭ na «SamŠazam» jak hość — aŭdytoryja vielmi ciopła mianie sustreła, bo ŭsie ŭsio razumieli. Sapraŭdy ŭ nas byli cudoŭnyja adnosiny ŭnutry kamjunici, jakoje my vybudavali. U nas ludzi znajomilisia i stvarali siemji, my razam prachodzili ŭsie hetyja emacyjnyja ciažkaści — ad kavidu da nastupstvaŭ represij. Kali pačałasia vajna, my razam usie refleksavali.

Praź niekalki miesiacaŭ Mikita vyrašyŭ źjechać u Polšču, ale paru razoŭ da hetaha paśpieŭ pravieści «SamŠazam». Paśla pierajezdu jamu pryjšłosia publična dystancyjavacca ad prajektu — ale za kadram pracavać nad im jon praciahvaŭ.

Mikita žartuje, što adčuvaŭ siabie ŭ toj čas byccam surahatny baćka — bo nikomu nie moh raskazać, što zajmajecca prajektam. Ale pryznajecca, što na dystancyi z kožnym miesiacam było ŭsio bolš składana padtrymlivać «SamŠazam».

Pavialičyć

— «SamŠazam» ad pačatku byŭ svabodalubivym, iraničnym prajektam. U 2018 hodzie my byli adbityja i ambitnyja, śmiełyja i viasiołyja. A ŭ 2023‑2024 hadach u krainie ŭžo było bolš zabaroniena, čym dazvolena.

Ad byłoj kamandy, ź jakoj my prajšli ahoń i vadu, zastavałasia ŭsio mienš udzielnikaŭ, trapili vypadkovyja ludzi… U Minsku «SamŠazam» užo nie moh być tym, što raniej. Treba było piać razoŭ dumać, ci možna ŭziać tuju ci inšuju pieśniu, dvuchsensoŭnyja žarty vyrašyli prybrać…

Mikita raspaviadaje, što z 2024 hoda značna ŭzmacniłasia cenzura — pačali patrabavać uzhadniać papiarednie ŭsie pieśni, jakija buduć hučać.

— Uvohule, paśla 2022 hoda muzyčny śviet padzialaŭsia na dva polusy. U Biełarusi pad zabaronu trapili artysty, jakija vystupili suprać vajny. Tamu mnohija lubimyja pieśni biełarusaŭ — naprykład, chity taho ž Mieładzie, Ziemfiry ci Puhačovaj akazalisia ŭ čornym śpisie. My krucilisia jak toj vuž, kab i prahramu zrabić cikavaj, i kab trek-list prajšoŭ uzhadnieńnie i «SamŠazam» atrymaŭ hastrolku. Nas prymusili prachodzić tuju praceduru, jakuju ciapier u Biełarusi prachodziać usie artysty.

U niejki momant kamanda stała pierad vybaram: ci kančatkova prymać praviły hulni, ci pieravozić «SamŠazam» u inšuju krainu.

Pavialičyć

Rašyli pierazapuskacca ŭ Polščy. Pieršyja imprezy zapłanavanyja ŭ Varšavie na 26 i 27 listapada.

— Tut užo žyvie šmat ludziej, jakija chadzili na «SamŠazam» u Minsku. Ja viedaju, što sabralisia ŭžo pryjechać ludzi z Urocłava, Hdańska i Vilni. Heta budzie «toj samy «SamŠazam», ale krychu adaptavany dla emihranckaj aŭdytoryi. Naprykład, zrobim «Emihrancki», «Nastalhičny» raŭndy dy «Biełaruskija zaškvary».

U budučyni Mikita taksama dumaje pra praviadzieńnie «SamŠazam» na anhlijskaj i, imavierna, na polskaj movach. A taksama spadziajecca, što atrymajecca pryvieźci šou ŭ inšyja harady Jeŭropy, dzie ciapier žyvie šmat biełarusaŭ.

— Pačynajecca jeŭrapiejskaja staronka ŭ žyćci «SamŠazam». Mnie samomu chočacca pabačycca z tymi biełarusami, ź jakimi my sustrakalisia ŭ Minsku. Spadziajusia, prajekt pryžyviecca i atrymaje praciah. Moža, kaniešnie, atrymacca i tak, što jon i zakryjecca chutka. Ale ciapier my poŭnyja entuzijazmu i impetu. 

• 7
• 0
• 0
• 0
• 0
• 0
• 0
• 0