«Шукаць сэнс ёсць». Як ідуць пошукі зніклых у Кыргызстане альпіністаў
У гарах Кыргызстана працягваюцца пошукі групы альпіністаў, сярод якіх двое беларусаў — 43‑гадовы Максім Палянскі і 60‑гадовы Мікалай Свірыдаў. Апошні раз яны, а таксама грамадзянін Літвы Сяргей Рубцоў, выходзілі на сувязь 2 жніўня. Як вядзецца аперацыя і чаму спецыялісты ўсё яшчэ лічаць яе мэтазгоднай, расказвае «Анлайнер».
20 ліпеня трое альпіністаў прылецелі ў горад Ош, атрымалі пагранічныя пропускі і дабраліся да старту маршруту ў цясніне ракі Кызылсу. Спадарожнікавы тэлефон не працаваў увесь паход, таму сувязь была эпізадычнай, праз кітайскага аператара. Менавіта па гэтай прычыне ў рэдкіх паведамленнях групы не было дакладных каардынат.
У суботу, 1 жніўня, усе трое падняліся на вяршыню піка Курумды (6613 м) па паўночным грэбні. На наступны дзень ад групы прыйшло апошняе паведамленне, дзе гаварылася пра гатоўнасць выехаць 4 жніўня ў 10:00. Машына двойчы прыязджала да месца прызначэння, але альпіністаў там не было.
З 7 жніўня пошукамі займаецца ратавальны атрад МНС Кыргызстана, а таксама добраахвотнікі. На наступны дзень у базавым лагеры выявілі палатку-склад, але людзей побач не было.
З 8 да 10 жніўня пошукі ўскладняліся дрэннымі ўмовамі надвор'я — ішлі снегапады, і верх маршруту немагчыма было агледзець. У аўторак надвор'е палепшылася, і ратавальнікі змаглі некалькі разоў запусціць дроны, каб абследаваць нявывучаныя ўчасткі меркаванага маршруту.
Блізкія зніклых стварылі спецыяльны сайт, дзе публікуюць апошнія навіны і рэквізіты для фінансавай дапамогі. Днямі ў СМІ з'явілася інфармацыя пра тое, што група нібыта не мела страхоўкі. Але жонка Максіма Палянскага Кацярына запэўніла журналіста «Анлайнера», што «група была застрахаваная».
«Страхоўка кампенсуе пошукава-ратавальныя работы лімітам 10 000 даляраў. Адзін вылет верталёта з'ядае яго цалкам. Усё астатняе аплачваюць сем'і. Таму адкрыты збор, — патлумачыў Аляксандр Смірноў, кіраўнік спецыяльнай групы з дасведчаных альпіністаў. — У Максіма і Мікалая ёсць званне «Снежнага барса» — усе пяць сямітысячнікаў былога СССР. Усе трое разам прайшлі пік Рэвалюцыі. Такія людзі ўмеюць доўга трымацца ў аварыйнай сітуацыі, таму шукаць сэнс ёсць».
У аўторак, 11 жніўня, да месца пошукаў вылецела жонка Максіма Палянскага Кацярына. Сёння яна павінна прыбыць у Ош, каб асабіста ўдзельнічаць у аперацыі. На момант падрыхтоўкі матэрыялу слядоў групы выяўлена не было.
Што вядома пра Максіма Палянскага і Мікалая Свірыдава — беларускіх альпіністаў, якія зніклі ў гарах Кыргызстана
«У нас няма іх каардынат, і гэта галоўная складанасць аперацыі». Як ідзе пошук зніклых у гарах Кыргызстана беларусаў і літоўца
Сталі вядомыя імёны зніклых у гарах Кыргызстана альпіністаў. Двое з іх беларусы
У гарах Кыргызстана знайшлі пусты намёт зніклых альпіністаў, сярод якіх двое беларусаў
У гарах Кыргызстана зніклі двое беларусаў
«Бульба» з Оршы пайшоў ваяваць за Расію — цяпер сястра шукае яго ці хаця б яго парэшткі9
Каментары