Ціханоўская перадала ліст патрыярху Варфаламею, які прыехаў у Літву
Святлана Ціханоўская выказала падзяку за стварэнне беларускай парафіі Канстанцінопальскага патрыярхату ў Вільні і падкрэсліла, што царква мае асаблівае значэнне для беларусаў, якія вымушаныя жыць у выгнанні. Пра гэта «Белсату» паведаміў дарадца Ціханоўскай у дыпламатычных пытаннях Дзяніс Кучынскі, які таксама перадаў патрыярху Канстанцінопальскаму падарунак ад лідаркі дэмакратычных сіл.
«Пояс быў вышыты адмыслова для гэтай сустрэчы»
Дзяніс Кучынскі назваў сустрэчу з патрыярхам Варфаламеем вялікім гонарам. Паводле яго, гэты візіт стаў важным сімвалам падтрымкі для беларускіх праваслаўных вернікаў Канстанцінопальскага патрыярхату і для беларускай грамады ў Вільні.
На яго думку, сустрэча дапаможа беларускім вернікам адчуваць сябе больш упэўнена, бо ў іх ёсць свая парафія і новая супольнасць. Ён таксама дадаў, што з размоў з вернікамі бачыць: гэта сапраўды жывая і згуртаваная супольнасць.
Патрыярху падарылі слуцкі пояс — адзін з сімвалаў Беларусі, ейнай гісторыі і спадчыны Вялікага Княства Літоўскага.
«Слуцкі пояс — гэта асобная цікавая гісторыя. Ён з Варшавы, яго прывезлі сёння ўначы. Гэта праца майстра, які робіць такія паясы ў Варшаве. Пояс быў вышыты адмыслова для гэтай сустрэчы: у залатым колеры, спецыяльна пад гэтую падзею», — кажа Кучынскі.
6 чэрвеня Канстанцінопальскі патрыярх Варфаламей прыбыў у Вільню з двухдзённым візітам, падчас якога сустрэўся з мясцовай праваслаўнай супольнасцю, што знаходзіцца пад юрысдыкцыяй Канстанцінопальскага патрыярхату, у тым ліку прадстаўнікамі беларускай парафіі.
Цяпер чытаюць
Хто такая Алеся Пархоменка з Кіпра, якая развязала беларуска-беларускую вайну88
Хто такая Алеся Пархоменка з Кіпра, якая развязала беларуска-беларускую вайну
«Доктарка», адвакат, чалавек з камерай і некалькі дужых хлопцаў. У Петрапаўлаўскай Баршчагоўцы расійскія спецслужбы скарысталіся спецыфічным украінскім бізнэсам ваеннага часу1515
Каментары