У Літве заявілі пра ціск з боку ЗША па аднаўленні транзіту беларускага калію
Міністр замежных спраў Літвы Кястуціс Будрыс на закрытым пасяджэнні фракцыі сацыял-дэмакратаў прызнаў, што з боку ЗША аказваецца ціск з мэтай дазволіць транзіт беларускіх угнаенняў праз Літву, піша Lrytas.
«Да сённяшняга дня, як публічна, так і вам, я паўтараў, што на нас няма ніякага ціску з боку амерыканцаў і ніякіх пытанняў, звязаных з угнаеннямі — як гэтыя санкцыі ўводзяцца і падобнае. Сёння я магу сказаць, што ціск узнікае», — працытавала крыніца словы Будрыса.
Паводле звестак крыніц BNS, міністр заявіў на сустрэчы, што ціск аказваецца не толькі на Літву, але і на іншыя краіны рэгіёну, праз якія мог бы ажыццяўляцца транзіт. Аднак Літва лічыцца найбольш прывабным маршрутам для транспарціроўкі ўгнаенняў у Балтыйскае мора.
Будрыс адмовіўся пацвердзіць журналістам у чацвер словы, сказаныя на закрытым пасяджэнні фракцыі сацыял-дэмакратаў, але заявіў, што з боку ЗША назіраецца «дадатковая актыўнасць» па пытанні транзіту ўгнаенняў.
Літва прыпыніла транзіт беларускіх калійных угнаенняў з 1 лютага 2022 года пасля таго, як ЗША ў 2021 годзе ўвялі санкцыі супраць «Беларуськалія» ў адказ на парушэнні правоў чалавека, рэпрэсіі супраць грамадзянскай супольнасці і фальсіфікацыю прэзідэнцкіх выбараў у Беларусі.
ЗША адмянілі гэтыя санкцыі ў гэтым годзе, калі рэжым Лукашэнкі вызваліў некаторых палітычных зняволеных.
Цяпер чытаюць
Памерла Святлана Курс. У яе творах спалучаліся магія жывога жыцця і бязлітасны псіхалагізм. А ў публічных выступах і ФБ — рэзкі антыімперыялізм і элегантны лірызм13
Каментары