Банкамат не прыняў у мінчанкі 100‑рублёвыя купюры. Ва ўсіх банкнот аказалася адна асаблівасць
У рэдакцыю MYFIN звярнулася Алена, якая сутыкнулася з нечаканым абмежаваннем. Беларуска «скарміла» банкамату некалькі тысяч рублёў — частку з іх банкамат «праглынуў», а частку вярнуў і адмовіўся прымаць.
— Я змарнавала прыкладна тры гадзіны, каб вырашыць гэтую праблему, — распавяла Алена.
Яна хацела пакласці буйную суму ў беларускіх рублях на рахунак у Банк БелВЭБ, але банкамат вярнуў частку грошай.
Пры гэтым на экране з’явілася паведамленне пра тое, што банкамат не прымае купюры ў 100 рублёў узору 2022 года. Менавіта такімі і аказаліся непрынятыя грошы Алены.
— Я патэлефанавала ў службу падтрымкі. Адзінае, чым мне дапамаглі — гэта параілі абмяняць гэтыя купюры ў касе. Мне прыйшлося патраціць свой асабісты час. Чаму ў Беларусі не наладжаны прыём усіх купюр? Гэта ж нашая нацыянальная валюта.
Банк: справа ў санкцыях
У адказе на запыт журналістаў MYFIN прадстаўнікі «Банка БелВЭБ» патлумачылі, што сітуацыя не звязаная з якасцю саміх грошай, а мае зусім іншы характар.
Праблема закранула банкаматы заходніх марак — Diebold Nixdorf і NCR. Гэтыя прылады патрабуюць спецыяльнага абнаўлення праграмнага забеспячэння, каб «пазнаваць» новыя беларускія банкноты.
З-за міжнародных санкцый амерыканскія і нямецкія вытворцы спынілі тэхнічную падтрымку і пастаўку абнаўленняў ПЗ у Беларусь і Расію. Гэта зрабіла немагчымай даналадку старых мадэляў пад новыя купюры.
А вось банкаматы азіяцкіх вытворцаў, такіх як Hyosung (Карэя) або GRG (Кітай), працуюць без абмежаванняў і спакойна прымаюць «соткі» 2022 года.
У банку паціху мяняюць банкаматы на тыя, што поўнасцю распазнаюць усе беларускія банкноты.
Цяпер чытаюць
Герой Беларусі Марына Васілеўская нарадзіла дачку ад касманаўта Алега Навіцкага16
Каментары