Чарга на два гады: як музей Петруся Броўкі стаў самым дэфіцытным месцам для спатканняў
Літаратурны музей Петруся Броўкі, імаверна, паставіў рэкорд сярод культурных устаноў краіны: чарга на вечаровую праграму «Музей для дваіх» расцягнулася да студзеня 2028 года. Гэты незвычайны фармат, які дазваляе закаханым застацца ў залах пасля іх закрыцця, выклікаў сапраўдны ажыятаж.
Старшы навуковы супрацоўнік музея Карына Кушчанка згадвае, што ўсё пачалося яшчэ ў 2015 годзе з простага конкурсу да Дня святога Валянціна, піша «Спутнік».
Тады закаханыя пары змагаліся за права правесці вечар у музеі, размяшчаючы свае фота з цытатамі паэта, але з 2023 года паслуга стала пастаяннай. «Сапраўдная папулярнасць абрынулася на нас пасля таго, як у музей прыйшлі блогеркі. Яны правялі ў нас дзявочнік, знялі ролік, які потым завірусіўся ў сацыяльных сетках», — кажа Карына Кушчанка.
У музеі да такога ажыятажу ставяцца пазітыўна, кажуць, на нагрузцы супрацоўнікаў гэтыя вячэрнія мерапрыемствы (а праводзяцца яны з 19:00 да 22:00) ніяк не адбіліся — у іх даволі гнуткі графік працы.
Сакрэт папулярнасці спатканняў у музеі крыецца ў эксклюзіўнасці і атмасферы «толькі для сваіх». Закаханым прапануюць не проста шпацыр, а тэматычную экскурсію з акцэнтам на гісторыю кахання Петруся Броўкі і яго жонкі Алены Міхайлаўны.
Гасцям дэманструюць унікальныя прадметы з фондаў, якія немагчыма ўбачыць у звычайнай экспазіцыі. Прычым па музейных правілах такія рарытэты можна паказваць не часцей за два разы на тыдзень, што і стварае шчыльнасць графіка.
«Хоць і паказваем мы іх, як належыць, у белых пальчатках, але па музейных правілах рабіць гэта можна толькі два разы на тыдзень. Вось у гэтым якраз і заключаецца эксклюзіўнасць гэтай паслугі», — тлумачаць у музеі.
А затым наведвальнікам могуць у рамантычных абставінах папіць гарбаты з водарам чабору «Пахне чабор» (па назве знакамітага лірычнага верша Броўкі) у самым далёкім пакоі музея з відам на Мінск.
Цяпер запіс вядзецца на студзень 2028-га, гэта значыць чарга расцягнулася на два гады.
Цікава, што нягледзячы на двухгадовае чаканне, людзі адмаўляюцца ад сваіх нумароў у чарзе вельмі рэдка.
Для тых, хто не гатовы чакаць да 2028 года, існуе адзіны спосаб абысці сістэму — выйграць спецыяльны сертыфікат падчас «Ночы музеяў».
Для вялікіх кампаній музей прапануе альтэрнатыву — «Музей для сяброў», дзе можна пагуляць у аўтэнтычныя настольныя гульні мінулай эпохі. Супрацоўнікі падкрэсліваюць, што такія інтэрактывы дазваляюць «паказаць Броўку з іншага боку», адкрываючы наведвальнікам яго хобі і неафіцыйнае жыццё.
Цяпер чытаюць
Сёстры Груздзевы драматычна расказалі, як іх выкінуў за дзверы міністр культуры Руслан Чарнецкі. «Як сабак»16
Каментары