Кіраўнікі краін ЕС і Брытаніі: Выключна Данія і Грэнландыя маюць права вырашаць пытанні, што тычацца Даніі і Грэнландыі
Падпісанты заявы падкрэслілі неабходнасць павагі да міжнароднага права.
«Грэнландыя належыць яе жыхарам. Выключна Данія і Грэнландыя маюць права вырашаць пытанні, што тычацца Даніі і Грэнландыі», — гаворыцца ў заяве, падпісанай, у прыватнасці, прэзідэнтам Францыі Эмануэлем Макронам, прэм’ер-міністрам Вялікабрытаніі Кірам Стармерам і прэм’ер-міністрам Польшчы Дональдам Тускам.
«Разам з многімі іншымі саюзнікамі мы ўзмацнілі сваю прысутнасць, актыўнасць і інвестыцыі, каб гарантаваць бяспеку ў Арктыцы і стрымліваць патэнцыйных праціўнікаў. Каралеўства Данія — у тым ліку Грэнландыя — з’яўляецца часткай НАТА».
«Гэта ўніверсальныя прынцыпы, і мы не спынімся ў іх абароне», — адзначылі яны.
Дональд Трамп неаднаразова сцвярджаў, што ЗША маюць патрэбу ў Грэнландыі са стратэгічных меркаванняў. Пры канцы снежня ён прызначыў губернатара Луізіяны Джэфа Лэндры спецыяльным пасланнікам Злучаных Штатаў па справах Грэнландыі, а той у сацыяльных сетках напісаў, што яго задачай будзе «далучэнне Грэнландыі да ЗША».
Перад аўторкавым вылетам у Парыж прэм'ер Польшчы Дональд Туск пракаментаваў сітуацыю вакол Грэнландыі, паведамляе Onet.pl.
— Ніводны член Паўночнаатлантычнага альянсу не павінен пагражаць іншаму члену. Я хацеў бы, каб у Вашынгтоне было зразумела: любыя спробы развалу Паўночнаатлантычнага пакта не атрымаюць прыняцця. Еўрапейская салідарнасць і павага да цэласнасці еўрапейскіх дзяржаў — гэта базавыя прынцыпы. Данія можа разлічваць на салідарнасць усёй Еўропы, — заявіў прэм’ер польскага ўрада.
Кіраўнік урада Грэнландыі Енс-Фрэдэрык Нільсен у панядзелак заявіў, што Грэнландыя — гэта народ, краіна і дэмакратыя, і гэта павінны паважаць найперш блізкія і надзейныя сябры.
«Калі прэзідэнт Злучаных Штатаў кажа: «Нам патрэбна Грэнландыя» і параўноўвае нас з Венесуэлай і [амерыканскім] ваенным умяшаннем, гэта не толькі недарэчна — гэта сведчыць пра адсутнасць павагі», — напісаў ён у Facebook.
«Мы частка НАТА і цалкам усведамляем стратэгічнае становішча нашай краіны», — падкрэсліў ён.
Цяпер чытаюць
Герой Беларусі Марына Васілеўская нарадзіла дачку ад касманаўта Алега Навіцкага38
Каментары