Kiraŭniki krain ES i Brytanii: Vyklučna Danija i Hrenłandyja majuć prava vyrašać pytańni, što tyčacca Danii i Hrenłandyi
Padpisanty zajavy padkreślili nieabchodnaść pavahi da mižnarodnaha prava.
«Hrenłandyja naležyć jaje žycharam. Vyklučna Danija i Hrenłandyja majuć prava vyrašać pytańni, što tyčacca Danii i Hrenłandyi», — havorycca ŭ zajavie, padpisanaj, u pryvatnaści, prezidentam Francyi Emanuelem Makronam, premjer-ministram Vialikabrytanii Kiram Starmieram i premjer-ministram Polščy Donaldam Tuskam.
«Razam z mnohimi inšymi sajuźnikami my ŭzmacnili svaju prysutnaść, aktyŭnaść i inviestycyi, kab harantavać biaśpieku ŭ Arktycy i strymlivać patencyjnych praciŭnikaŭ. Karaleŭstva Danija — u tym liku Hrenłandyja — źjaŭlajecca častkaj NATA».
«Heta ŭniviersalnyja pryncypy, i my nie spynimsia ŭ ich abaronie», — adznačyli jany.
Donald Tramp nieadnarazova śćviardžaŭ, što ZŠA majuć patrebu ŭ Hrenłandyi sa stratehičnych mierkavańniaŭ. Pry kancy śniežnia jon pryznačyŭ hubiernatara Łuizijany Džefa Łendry śpiecyjalnym pasłańnikam Złučanych Štataŭ pa spravach Hrenłandyi, a toj u sacyjalnych sietkach napisaŭ, što jaho zadačaj budzie «dałučeńnie Hrenłandyi da ZŠA».
Pierad aŭtorkavym vyletam u Paryž premjer Polščy Donald Tusk prakamientavaŭ situacyju vakoł Hrenłandyi, paviedamlaje Onet.pl.
— Nivodny člen Paŭnočnaatłantyčnaha aljansu nie pavinien pahražać inšamu členu. Ja chacieŭ by, kab u Vašynhtonie było zrazumieła: lubyja sproby razvału Paŭnočnaatłantyčnaha pakta nie atrymajuć pryniaćcia. Jeŭrapiejskaja salidarnaść i pavaha da cełasnaści jeŭrapiejskich dziaržaŭ — heta bazavyja pryncypy. Danija moža raźličvać na salidarnaść usioj Jeŭropy, — zajaviŭ premjer polskaha ŭrada.
Kiraŭnik urada Hrenłandyi Jens-Frederyk Nilsien u paniadziełak zajaviŭ, što Hrenłandyja — heta narod, kraina i demakratyja, i heta pavinny pavažać najpierš blizkija i nadziejnyja siabry.
«Kali prezident Złučanych Štataŭ kaža: «Nam patrebna Hrenłandyja» i paraŭnoŭvaje nas ź Vieniesuełaj i [amierykanskim] vajennym umiašańniem, heta nie tolki niedarečna — heta śviedčyć pra adsutnaść pavahi», — napisaŭ jon u Facebook.
«My častka NATA i całkam uśviedamlajem stratehičnaje stanovišča našaj krainy», — padkreśliŭ jon.
Łukašenka niervova prakamientavaŭ vizit Cichanoŭskaj u Kijeŭ45
Kamientary