«Гэта і ёсць корань усіх нашых бед». Шуневіч узяўся за егераў — збіраецца абмежаваць іх паўнамоцтвы і змяніць правілы палявання
Беларускае таварыства паляўнічых і рыбаловаў (БТПР) правяло з'езд у Мінску, дзе кіраўнік арганізацыі Ігар Шуневіч заявіў, што надыходзіць час змены правіл палявання. Прычынамі сталі скаргі, страты і «гурткі» егераў, піша «Люстэрка».
Паводле слоў Шуневіча, сёння праца ўсяго БТПР не дае чаканага выніку. Прычыну гэтага ён бачыць на ніжнім звяне — у першасных арганізацыях і паляўнічых гаспадарках.
Экс-кіраўнік МУС заявіў, што па факце сёння БТПР кіруе не ён, не абласныя праўленні і нават не старшыні раённых структур, а «сярэднестатыстычны егер».
Егер вырашае: калі ладзіць паляванне, што будзе для адстрэлу, хто паедзе, колькі заплаціць, куды пойдуць грошы, хто будзе на якім нумары, ці будзе ўвогуле выконвацца закон.
«Гэта не эмоцыі — гэта канстатацыя факту, — паведаміў Шуневіч удзельнікам з'езда. — І я прыкладу ўсе сілы, увесь свой вопыт і веды, каб гэтую загану ліквідаваць цалкам і беззваротна».
Шуневіч перасцярог прысутных ад «рэзкіх дзеянняў», патлумачыўшы, што гэты паляўнічы год дапрацоўваюць па старых правілах. Людзі павінны спакойна завяршыць пуцёўкі, здаць справаздачу, здаць зброю на захоўванне. А вось з 1 студзеня наступнага года ўсё кардынальна зменіцца.
Асноўнае змяненне, якое тычыцца кожнага, — егер перастане быць арганізатарам палявання. Егер становіцца выключна выканаўцам — ажыццяўляльнікам палявання.
Канкрэтна гэта значыць наступнае.
У егера больш не будзе асабістай кліенцкай базы.
Егер не мае права самастойна запрашаць паляўнічых, дамаўляцца аб сустрэчах, прымаць грошы.
Егер не вырашае, дзе і калі будзе праводзіцца паляванне.
Егер атрымлівае ад свайго непасрэднага кіраўніка (старшага егера, палявода ці старшыні раённай структуры) дакладнае вытворчае заданне, аформленыя дакументы, пуцёўкі і паліва па талонах або картках — і выконвае яго.
Усе зносiны з паляўнічымі наконт арганізацыі калектыўных паляванняў, збор грошай, выдача пуцёвак — цалкам кладзецца на раённыя і міжраённыя структуры, на паляводаў і старшыняў.
Рыхтуецца дакумент
«Гэта не пажаданне — гэта будзе аформлена адзіным нарматыўным дакументам, абавязковым для выканання на ўсёй паляўнічай тэрыторыі, арандаванай БТПР, невыкананне якога будзе разглядацца як грубае парушэнне працоўнай дысцыпліны», — сказаў Шуневіч.
Ён дадаў, што змены ўводзяцца таму, што «сённяшняя сістэма спараджае безадказнасць на ўсіх узроўнях, вядзе да матэрыяльных страт, спараджае шматлікія скаргі паляўнічых, іміджавыя страты», і такіх прыкладаў дзясяткі. З новага паляўнічага сезона такой схемы больш не будзе.
«Кіраўнік арганізоўвае і адказвае за ўсё, што адбываецца ў яго гаспадарцы, — 24 гадзіны ў суткі, 7 дзён на тыдзень, 365 дзён на год. У выходны, у свята, ноччу — усё роўна», — падкрэсліў Шуневіч.
Паводле яго слоў, ні для каго не сакрэт, што ў большасці егераў ёсць свае «гурткі па інтарэсах», у якія ўваходзяць даўно ім знаёмыя паляўнічыя. І калектыўныя паляванні праводзяцца ў асноўным для гэтага абмежаванага кола асоб. За такі від «паслугі» егер нярэдка атрымлівае нядрэнныя «бонусы».
«Гэта і ёсць корань усіх нашых сённяшніх бед: грошы ідуць па-за касы, парушэнні прыкрываюцца, адказнасць размазваецца», — заявіў Шуневіч.
Пры гэтым ён паабяцаў «сур'ёзнае матэрыяльнае заахвочванне» тым егерам, якія сумленна пяройдуць на новую сістэму, будуць якасна выконваць толькі сваю непасрэдную працу і прыносіць даход менавіта арганізацыі, а не сабе ў кішэню. Будзе распрацаваная празрыстая сістэма прэмій і надбавак.
Каментары
Локально ,егерь царь и бог охоты.
Просто по путевке/лицензии хрен куда сунешься,везде кружки по интересам.