Расійскі маркетплэйс Ozon у кастрычніку 2026 года адкрыў у Беларусі два новыя лагістычныя цэнтры агульнай плошчай 38,1 тысячы квадратных метраў. Пра гэта паведаміла агенцтва нерухомасці Result Estate, піша Primepress.by.
Новы лагістычны цэнтр Ozon у Балбасаве Аршанскага раёна займае 26 тысяч квадратных метраў. Ён ужо пачаў працу: з 5 кастрычніка прымае пастаўкі, а з 12 кастрычніка плануе пачаць адгружаць заказы.
Другі цэнтр плошчай 12,1 тысячы квадратных метраў размешчаны ў вытворча-складскім комплексе ў Мінску на вуліцы Гарэцкага. З 8 кастрычніка ён пачаў абслугоўваць лагістычныя плыні маркетплэйса.
Пасля адкрыцця гэтых двух аб’ектаў агульныя лагістычныя магутнасці Ozon у Беларусі выраслі больш чым удвая — прыкладна да 65 тысяч квадратных метраў.
Акрамя новых цэнтраў, інфраструктура Ozon у Беларусі ўключае хаб на арандаваных плошчах транспартна-лагістычнага комплексу «Каралёў Стан» пад Мінскам, а таксама сартавальныя цэнтры ў Оршы, Гродне і Баранавічах.
У Result Estate адзначылі, што пашырэнне Ozon сведчыць пра рост попыту на сучасныя складскія памяшканні ў Беларусі. На думку агенцтва, для рынку камерцыйнай нерухомасці гэта паказчык далейшага развіцця лагістычнай інфраструктуры і павелічэння патрэбы ў якасных складскіх аб’ектах.
Ozon — адна з буйных шматкатэгарыйных платформаў электроннай камерцыі і маркетплэйсаў у Расіі. Кампанія была заснаваная ў 1998 годзе. У апошнія месяцы яе склады ў Расіі, паралельна са складамі галоўнага канкурэнта Wildberries, рэгулярна трапляюць пад удары ўкраінскіх беспілотнікаў.
Каментары