На фронце загінуў сын экс-кандыдата ў прэзідэнты Дзмітрыя Уса. Іван ваяваў за Расію
Іван Ус некалі ўзначальваў рух «Антымайдан Мінск», у 2020‑м адседзеў на сутках за ўдзел у пратэстах супраць Аляксандра Лукашэнкі, а ў 2025‑м паехаў ваяваць за Расію. На фронце ён пратрымаўся вобмаль часу.
«Нашай Ніве» стала вядома пра гібель на фронце 28‑гадовага беларуса Івана Уса. Ён пайшоў ваяваць за Расію ва Украіне у пачатку 2025 года.
Гэта сын Дзмітрыя Уса — выпадковага і ў чымсьці нават трагікамічнага кандыдата ў прэзідэнты — 2010, які тым не менш за ўдзел у выбарах трапіў у калонію.
Іван Ус у сярэдзіне 2010‑х быў адміністратарам прарасійскай суполкі «Антымайдан Мінск» у сацыяльнай сетцы «УКантакце».
У 2020‑м Ус-малодшы далучыўся да пратэстаў супраць Аляксандра Лукашэнкі і нават трапіў на 15 сутак за ўдзел у маршы 16 жніўня.
17 студзеня 2025 года Іван Ус падпісаў кантракт з расійскай арміяй. Тады і пайшоў адлік яго апошніх дзён. Нам дакладна невядомая дата смерці сына кандыдата ў прэзідэнты, але ён загінуў прыкладна ў канцы зімы ці самым пачатку вясны.
Дзмітрый Ус — бізнэсмен, уласнік картаграфічнага бізнэсу. Там, дарэчы, працаваў і яго сын.
На прэзідэнцкіх выбарах — 2010 Ус вырашыў дапамагчы сабраць подпісы Міколу Статкевічу, але заадно збіраў подпісы і за сябе. Іх колькасць была відавочна мізэрнай, але ў тую кампанію Аляксандр Лукашэнка вырашыў зарэгістраваць кандыдатамі ўсіх ахвотных. Так у бюлетэні патрапіў і Ус, які нават не мог весці паўнавартасную агітацыйную кампанію — праз наступствы інсульту ён ледзь размаўляў.
Лідзія Ярмошына заявіла, што на выбарах за яго прагаласавалі 25 тысяч чалавек (менш за 0,4%).
Аднак гэта не ўратавала Уса ад паслявыбарчых рэпрэсій. Яго арыштавалі, на нейкі час адпусцілі дадому, але ўрэшце ўсё адно прысудзілі пяць з паловай гадоў зняволення. Экс-кандыдата ўтрымлівалі ў шклоўскай калоніі. Праз пяць месяцаў Ус выйшаў на свабоду па памілаванні.
Цяпер чытаюць
18‑гадовага хлопца абвінавацілі ў адмаўленні генацыду беларускага народа24
18‑гадовага хлопца абвінавацілі ў адмаўленні генацыду беларускага народа
«Быў галодны, як з Асвенціма, не еў ні мяса, ні гародніны». Што вядома пра смерць бабруйскага журналіста, на якога завялі крымінальную справу ў Польшчы1111
Каментары