Вялікі арабскі комплекс на месцы былога «Белэкспа» ў Мінску амаль гатовы. Вось як ён выглядае
У Мінску працягваецца будаўніцтва шматфункцыянальнага комплексу каля Свіслачы на вуліцы Янкі Купалы. Там будзе ў тым ліку лакшэры-гатэль і рэстаран, які лунае над вадой. Realt.by паказаў, як цяпер усё гэта выглядае.
У 2016 годзе гэты ўчастак, дзе быў павільён «Белэкспа» і другая бальніца, указам Лукашэнкі перадалі кампаніі Kopaonik Property Investment з ААЭ. З 2019 года тут будуюць шматфункцыянальны комплекс. Архітэктурныя рашэнні распрацоўвала кампанія «Вараб'ёў і партнёры».
Комплекс можна падзяліць на дзве часткі. Першая ўжо рэалізаваная. Гаворка пра рэканструяваныя гістарычныя будынкі былога Траецкага манастыра базыльянак (пазней — другой бальніцы), якія знаходзяцца бліжэй да вуліцы Багдановіча. У іх размесцяцца медыцынскі і дзіцячы цэнтры, гандлёвыя пункты і кавярні. Акрамя таго, у 2022 годзе тут адкрыўся гатэль сеткі Hilton.
Другая частка комплексу — новыя збудаванні на месцы знесенага «Белэкспа». Тут, па-першае, размесціцца вялікі гатэль Waldorf Astoria. Гэта лакшэры-брэнд, які з'яўляецца часткай гатэльнай сеткі Hilton Worldwide. Акрамя яго, у другой частцы комплексу будуць розныя грамадскія аб'екты: гандлёвы комплекс, казіно, спа-комплекс з басейнам, кавярні і іншае.
Будынак гатэля ўжо амаль дабудавалі. Цяпер там вядуць унутранае аздабленне.
Яшчэ адной асаблівасцю комплексу будзе рэстаран, які навісае над Свіслаччу. Ён таксама ў высокай ступені гатоўнасці.
Акрамя таго, вакол комплексу ўжо пачалі акультурваць тэрыторыю. Раней заяўлялася, што дабудаваць усё плануюць сёлета. Мяркуючы па тэмпах работ, гэта рэальна.
Гісторыя ўчастка
Нагадаем, што яшчэ ў 2010 годзе інвестары з Амана вырашылі да 2016 года пабудаваць тут бізнэс-цэнтр, пяцізоркавы гатэль і жылыя будынкі. Пляцоўка дасталася ім па ўказе Лукашэнкі за 10 мільёнаў долараў. Але аманцы ад гэтага праекта (і зямлі) у выніку адмовіліся.
А ў 2016 годзе гэты ўчастак па інвестдамове перадалі кампаніі Kopaonik Property Investment з Аб'яднаных Арабскіх Эміратаў. У Беларусі яна працуе праз ТАА «КПІ Дэвелапмент». Kopaonik уваходзіць у інвестыцыйны фонд Royal Group, а яго, у сваю чаргу, узначальвае шэйх Тахнун бін Заід аль-Нахаян з правячай дынастыі эмірата Абу-Дабі. Гэта самы буйны рэгіён ААЭ.
Меркаваны аб'ём інвестыцый у ствараны кампаніяй Kopaonik Property Investment аб'ект — каля 250 мільёнаў даляраў.
Каля новай станцыі метро хочуць знесці прыватны сектар і двухпавярхоўкі. Мінчан клічуць на абмеркаванне
Беларус за 120 рублёў набыў дзіцячы садок і хоча зрабіць з яго салон прыгажосці
У Мінску прадаецца дом за рэкордныя 3,3 мільёна даляраў
У Мінску зноў загаварылі пра знос прыватнага сектара ў раёне Арлоўскай
Цяпер чытаюць
КДБ арыштаваў падазронага актывіста Паўла Бялюціна. У якой краіне гэта адбылося, невядома8
Каментары