Vialiki arabski kompleks na miescy byłoha «Biełekspa» ŭ Minsku amal hatovy. Voś jak jon vyhladaje
U Minsku praciahvajecca budaŭnictva šmatfunkcyjanalnaha kompleksu kala Śvisłačy na vulicy Janki Kupały. Tam budzie ŭ tym liku łakšery-hatel i restaran, jaki łunaje nad vadoj. Realt.by pakazaŭ, jak ciapier usio heta vyhladaje.
U 2016 hodzie hety ŭčastak, dzie byŭ paviljon «Biełekspa» i druhaja balnica, ukazam Łukašenki pieradali kampanii Kopaonik Property Investment z AAE. Z 2019 hoda tut budujuć šmatfunkcyjanalny kompleks. Architekturnyja rašeńni raspracoŭvała kampanija «Varabjoŭ i partniory».
Kompleks možna padzialić na dźvie častki. Pieršaja ŭžo realizavanaja. Havorka pra rekanstrujavanyja histaryčnyja budynki byłoha Trajeckaha manastyra bazyljanak (paźniej — druhoj balnicy), jakija znachodziacca bližej da vulicy Bahdanoviča. U ich raźmieściacca miedycynski i dziciačy centry, handlovyja punkty i kaviarni. Akramia taho, u 2022 hodzie tut adkryŭsia hatel sietki Hilton.
Druhaja častka kompleksu — novyja zbudavańni na miescy źniesienaha «Biełekspa». Tut, pa-pieršaje, raźmieścicca vialiki hatel Waldorf Astoria. Heta łakšery-brend, jaki źjaŭlajecca častkaj hatelnaj sietki Hilton Worldwide. Akramia jaho, u druhoj častcy kompleksu buduć roznyja hramadskija abjekty: handlovy kompleks, kazino, spa-kompleks z basiejnam, kaviarni i inšaje.
Budynak hatela ŭžo amal dabudavali. Ciapier tam viaduć unutranaje azdableńnie.
Jašče adnoj asablivaściu kompleksu budzie restaran, jaki navisaje nad Śvisłačču. Jon taksama ŭ vysokaj stupieni hatoŭnaści.
Akramia taho, vakoł kompleksu ŭžo pačali akulturvać terytoryju. Raniej zajaŭlałasia, što dabudavać usio płanujuć sioleta. Miarkujučy pa tempach rabot, heta realna.
Historyja ŭčastka
Nahadajem, što jašče ŭ 2010 hodzie inviestary z Amana vyrašyli da 2016 hoda pabudavać tut biznes-centr, piacizorkavy hatel i žyłyja budynki. Placoŭka dastałasia im pa ŭkazie Łukašenki za 10 miljonaŭ dołaraŭ. Ale amancy ad hetaha prajekta (i ziamli) u vyniku admovilisia.
A ŭ 2016 hodzie hety ŭčastak pa inviestdamovie pieradali kampanii Kopaonik Property Investment z Abjadnanych Arabskich Emirataŭ. U Biełarusi jana pracuje praz TAA «KPI Deviełapmient». Kopaonik uvachodzić u inviestycyjny fond Royal Group, a jaho, u svaju čarhu, uznačalvaje šejch Tachnun bin Zaid al-Nachajan z praviačaj dynastyi emirata Abu-Dabi. Heta samy bujny rehijon AAE.
Mierkavany abjom inviestycyj u stvarany kampanijaj Kopaonik Property Investment abjekt — kala 250 miljonaŭ dalaraŭ.
Kala novaj stancyi mietro chočuć źnieści pryvatny siektar i dvuchpaviarchoŭki. Minčan kličuć na abmierkavańnie
Biełarus za 120 rubloŭ nabyŭ dziciačy sadok i choča zrabić ź jaho sałon pryhažości
U Minsku pradajecca dom za rekordnyja 3,3 miljona dalaraŭ
U Minsku znoŭ zahavaryli pra znos pryvatnaha siektara ŭ rajonie Arłoŭskaj
Kamientary